Rihapet dhe njëherë debati mbi fatin e kanabisit në vendin tonë, muaj pasi deputeti Koço Kokëdhima hodhi idenë e legalizimit të tij për t`ia destinuar tregut farmaceutik botëror. Duhet kujtuar se kjo, ndodhi disa javë pas aksionit gjigand në Lazarat, ku për herë të parë pas 20 vitesh, shteti arriti të marrë kontrollin e fshatit legjendar dhe ta pastrojë atë nga gjithë sipërfaqet e mbjella me bimë narkotike. Por, nisur nga një logjikë ekonomike dhe financiare, Kokëdhima propozoi që tregu i kanabisit të mos eliminohej, ai të legalizohej nga shteti, dhe të futej tek tregu i madh botëror farmaceutik, duke shpëtuar kështu jo vetëm ekonominë e një zonë, siç është ajo e jugut, por dhe vetë ekonominë shqiptare, në të cilën qarkullonin miliona euro si pasojë e kabanisit të Lazaratit. Dhe sot është analisti Genc Burimi ai që e ka mbështetur këte ide, duke e ilustruar me të dhëna tregu se ç`po humbim e se ç`do fitonim, gjithnjë nëse kanabisi do legalizohej në funksion të tregut farmaceutik botëror, që sipas tij ka një uri të jashtëzakonshme për këtë produkt bimor.
