Presidenti i pezulluar i FIFA-s, Sepp Blatter, ka zbuluar një tjetër skandal të organizatës që ai drejton. Shtëpia më e madhe e futbollit, i kishte dhënë Rusisë organizimin e kampionatit botëror të vitit 2018 ende pa dalë në votime.
Madje, ai shton më tutje duke thënë se kampionati botëror i vitit 2022, ishte paraparë që të zhvillohej në SHBA, mirëpo ndërhyrja e Presidentit të UEFA-s, Michel Platini, bëri që organizimin për këtë kompeticion ta marrë Katari.
“Në vitin 2010 kemi patur një diskutim lidhur me organizimin e kampionateve botërore për vitin 2018 dhe 2022. Fillimisht u dakorduam që kampionatin botëror të vitit 2018 ta organizojë Rusia, pasi asnjëherë më parë ky kompeticion nuk ishte ishte zhvilluar në Evropën Lindore dhe pastaj të ktheheshim në vitin 2022 në Amerikë. Kështu, ne do kishim në përkrahje dy superfuqitë botërore”, potencoi Blatter.
Më pas, Blatter shton se gjithçka ndryshoi nga një takim që kishte patur me presidentin francez të asaj kohe, Nicolas Sarkozy-n, princin e Katarit dhe Presidentin e UEFA-s, Michael Platini-n.
“Në kishim bërë gjithçka gati që ti jepnim SHBA-ve, të drejtën për të organizuar botërorin e vitit 2022. Por, gjatë darkës, gjithçka ndryshoi dhe Platini insistoi që Katari të marrë të drejtën për të organizuar kampionatin botëror. Dhe, kjo e ndryshoi gjithë planin”, theksoi Blatter.
Blatter, i cili po përballet me një akuzë që e rëndon atë për korrupsion, nuk e konfirmon një gjë të tillë, megjithëse këmbëngul se Rusia dhe Katari nuk do ta humbasin të drejtën e tyre për të organizuar kampionatin botëror.
“Jo. Nuk do ta humbasin këtë mundësi, as Rusia por as Katari. Tashmë gjithçka është e rregulluar sipas dokumentacioneve të FIFA-s dhe nuk do të ketë ndryshime”, përfundoi Blatter. /tesheshi.com/
