Serbia përmes strukturave të saj planifikoi përshkallëzimin e situatës së sigurisë në veri të Kosovës. Në kuadër të këtij plani, ka një provokim nga sulmet e eksponentëve të krimit të organizuar të lidhur me strukturat e sigurisë dhe politike në Serbi ndaj Policisë së Kosovës dhe pjesëtarëve të KFOR-it në veri.
Sipas planit, anëtarët e EULEX-it gjithashtu mund të jenë në shënjestër.
KosovaPress mëson se qëllimi i planit është përshkallëzimi i situatës përmes incidenteve të inskenuara që do të çonin në një konflikt të hapur ndërmjet policisë dhe KFOR-it nga njëra anë dhe eksponentëve serbo-rusë nga ana tjetër, ku këta të fundit shpresojnë të mbështesin elementët ushtarakë nga Serbia përmes rrugëve ilegale në veri të Kosovës.
Me këtë qëllim, thuhet se Serbia ka rekrutuar grupe të rinjsh në Veri, të cilët trajtohen si përgjegjës për zbatimin e planit. Ata janë pjesë e grupit kriminal të ashtuquajtur “Brigada e Veriut”, i cili dyshohet për përfshirje në shumë vepra kriminale, përfshirë djegien e veturave të serbëve nga Veriu i vendit.
Disa nga drejtuesit e saj kanë njohje personale me presidentin e Serbisë, Aleksandar Vuçiç, si Vladimir Radivojeviç, i njohur me nofkën “Mami” nga Zveçani.
Se KFOR-i dhe pjesëtarët e tij janë shënjestër e këtyre grupeve, tregon edhe aksioni i datës 26 gusht, kur ata vëzhguan dhe fotografuan pikat statike të KFOR-it në Veri dhe i publikuan ato së bashku me koordinatat dhe sipas shtetit të cilin ata i përkasin.
KosovaPress mëson se ata janë të gatshëm të sulmojnë institucionet e përmendura të sigurisë.
Po kush janë eksponentët kryesorë të planit anti-KFOR?
Vladimir Radivojeviç, i njohur me pseudonimin “Mami”. “Mami” ka njohje të drejtpërdrejta me presidentin Vuçiç.
“Mami” ka shumë lidhje politike dhe me grupe të ndryshme kriminale në veri të vendit. Ai është pjesë e tifozëve “Delije” nga Zveçani.
Aleksandar Jevremoviç nga Leposaviqi, nipi i ish-ministrit serb Goran Bogdanoviç. Së bashku me anëtarin e VBA-së, Marko Vukashinoviçin, ai drejton një grup njerëzish në Leposaviq të cilët paraqiten si “Mbrojtja Civile”, ndërsa operojnë nga lokali “Mistik” aty.
Në këto plane është përfshirë edhe Ugljesha Jarediç, ish-komandanti i Njësisë së Reagimit të Shpejtë të Policisë së Kosovës për Veri, i integruar në strukturat e MPB-së, i cili një muaj më parë dha dorëheqje nga Policia e Kosovës. Më parë ka qenë edhe pjesë e xhandarmërisë serbe. /tesheshi.com/
