Duhej të ishte një ditë feste në Milano të Italisë ajo e djeshmja, ndërsa e gjithë bota ka kthyer sytë nga ky qytet ku po zhvillohet Panairi Botëror Milan Expo 2015. Disa protestues në kuadër të 1 Majit, këtë vit ia kanë dedikuar manifestimit të tyre tematikës No Ekspo, në kuadër të paradës kombëtare Mayday.
Në një pjesë të madhe të rrugëve protestuesit kanë hapur zjarr dhe i kanë bllokuar ato. Disa prej manifestuesve kanë hedhur objekte dhe gurë kundër karabinierëve dhe forcave të rendit, të cilat kanë qenë në gatishmëri për të mbajtur nën kontroll protestën. Disa makinave iu është vënë zjarri.
Fillimisht protesta ka nisur në mënyrë paqësore dhe më pas ka degjeneruar në përdorimin e dhunës. E organizuar kryesisht pjesë të organizatave të majta dhe studentë të cilët kundërshtojnë masat shtrënguese të qeverisë Renci dhe shpenzimet e mëdha që janë bërë për panairin, ku vetëm pavioni italian ka kaluar parashikimet me rreth 30 milion euro, situata ka dalë jashtë kontrollit kur me protestuesit janë bashkuar disa grupe anarkistësh radikalë (të njohur si black bloc të ardhur nga Franca, Gjermania dhe Spanja).
Manifestuesit, të veshur me të zeza, kanë thyer xhamat e disa dyqaneve, kanë shkatërruar disa makina duke hedhur bomba molotov dhe sende të forta kundër forcave të rendit, të cilat janë përgjigjur duke hedhur gaz lotsjellës.
Alfano: Siguri maksimale – “Një falënderim të madh për forcat e rendit dhe të gjithë sistemit të sigurisë në Milano, nga prefekti tek kuestori dhe të gjithë që kanë bashkëpunuar. Kanë evituar më të keqen që mund të ndodhte me inteligjencë dhe qetësi”,- ka komentuar ministri i Brendshëm Angelino Alfano.
“Taktika e përdorur në këtë ngjarje ka mundësuar sigurinë maksimale për vizitorët dhe ata që kanë shijuar panairin. Dita e inaugurimit të Milano Expo 2015 nuk është shënuar me njolla gjaku të manifestuesve”,- ka thënë më tej ministri Alfano.
Bilanci përfundimtar – Më fund të gjithçkaje, 11 persona kanë ngelur të plagosur, ndërsa 120 të tjera janë shoqëruar në komisariat (njëri është ndaluar në flagrancë nga dy agjentë në mes të përplasjes me policinë). Ajo që ka rënduar më shumë shtetin dhe qytetin, është plagosja e ditës së festës, e cila kushton më shumë në imazhin e Italisë se sa dëmtimet e pësuara nga ana e protestuesve dhe policisë./tesheshi.com/
