Ministrja e Mbrojtjes, Mimi Kodheli ka ngacmuar një ndër ato që mund të konsiderohen “plagë të vjetra” të opozitës së dikurshme socialiste nën qeverisjen e Berishës.
Bëhet fjalë për një përgjim nga Shërbimi Informativ i Ushtrisë në kohën kur Ministria e Mbrojtjes drejtohej nga Arben Imami. Në atë kohë u përfol se ishin përgjuar krerë të opozitës dhe ambasadorë të huaj në Tiranë.
“Kur mora detyrën e ministres së Mbrojtjes në vitin 2013, vija nga opozita e atëhershme, politikanët e të cilës ashtu sikurse edhe diplomatët përgjoheshin nga shërbimi juaj duke krijuar një klimë pinoçetiane në një vend anëtar të NATO-s dhe në mes të Evropës. Prandaj i vura pikësynim vetes ta pastroja këtë shërbim nga ato mbeturina”, ka deklaruar Kodheli në një ceremoni me rastin e 65-vjetorit të krijimit të radiozbulimit të ushtrisë shqiptare.
Edhe për këtë arsye, Kodheli qe e para ministre që hartoi dosjen e paraardhësit të saj, Imami duke e çuar në prokurori, por që kurrë nuk u bë e mundur që ky i fundit të dënohet. /tesheshi.com/
