Piramida që ka trazuar opinionin në Egjipt

Ministria egjiptiane e antikiteteve tha se po krijon një komitet për të rishikuar restaurimin e një prej piramidave në Giza pas protestave publike mbi projektin.

Shtatë ditë më parë, kreu i Këshillit Suprem të Antikiteteve të Egjiptit, Mostafa Waziri, postoi një video në Facebook duke treguar punëtorët duke vendosur blloqe graniti në bazën e më të ulëtit nga tre piramidat e Gizës.

Videoja shkaktoi një stuhi kritikash nga egjiptologët të cilët shprehën frikën e tyre se po zhvillohet një rindërtim gjithëpërfshirës i monumentit të famshëm, në kurriz të ruajtjes së strukturës së tij historike, transmeton AFP.

Në përpjekje për të qetësuar debatin, në një vend ku turizmi përbën dhjetë për qind të PBB-së, ministria njoftoi se kishte ngritur një “komitet shkencor të kryesuar nga… Zahi Hawass”, një arkeolog i njohur egjiptian, për të analizuar projektin e rindërtimit.

Bordi përbëhet nga “ekspertë të inxhinierisë dhe arkeologjisë” nga Republika Çeke, Gjermania dhe Shtetet e Bashkuara, si dhe nga Egjipti.

Piramida origjinale e mbuluar me granit

Raporti përfundimtar i komitetit do të përfshijë “procedurat dhe hapat e nevojshëm për koordinim me agjencinë e OKB-së për trashëgiminë (UNESCO)”.

“Do të merret një vendim nëse projekti do të vazhdojë apo jo”, tha ministria.

Në rrëzë të asaj piramide, raportoi AFP, puna ishte duke u zhvilluar tashmë javën e kaluar.

Në formën e saj origjinale, baza e piramidës ishte e mbuluar me granit, por me kalimin e kohës një pjesë e asaj veshjeje humbi.

Rinovimi synon të rivendosë stilin origjinal të ndërtesës duke rindërtuar bazën e granitit.

Çështja e ruajtjes së trashëgimisë në Egjipt është shpesh në qendër të debateve të nxehta.

Shkatërrimi i fundit i pjesëve të bërthamës historike të Kajros ka ndezur fushata publike kundër tij, një gjë e rrallë në një vend ku opozita politike është kryesisht e ndaluar. /tesheshi.com/