Lëvizja Socialiste për Integrim i ka bërë një paralajmërim publik aleates së saj kryesore Partisë Socialiste.
Nënkryetari i LSI-së, Petrit Vasili, në një dalje për mediat, i ka bërë thirrje partnerit të saj që të jetë i kujdesshëm me politikën fiskale, duke komentuar në këtë rast, zërat që vijnë për një ligj të ri mbi tatimin mbi të ardhurat personale.
“Çdo ndryshim i politikave të taksave nuk duhet priret nga pamjaftueshmëritë që lidhen me evazionin fiksal, administrimet e dobëta apo korrupsionin, por duhet të priret nga qëndrime vizionare që nënkuptojnë se këta elementë janë të përmirësueshëm dhe në dorë të qeverisë, ndërsa elementët e tjerë kanë të bëjnë me orientimin e biznesit dhe të ardhmen e tij”, tha Vasili.
Nënkryetari i LSI-së deklaroi se zërat mbi një përçarje mes PS-së dhe partisë së tij nuk qëndrojnë, por gjithsesi ai shfaqi vizionin e LSI-së në aleancë.
“Marrëdhënia jonë ndërtohet mbi mekanizmat politikë, ecën në rrugën e një konstruktiviteti evident për të tërë, të një korrektese që ka dhënë prova pa fund të respektimit të saj nga LSI dhe besoj se këto duhet të jenë shinat ku duhet të vazhdojë të qëndrojë një aleancë politike”, tha Petrit Vasili.
Ndërkaq, numri dy i LSI-së e ka cilësuar si “një humbje kohe” kthimin e ligjit për turizmin nga ana e Presidentit të Republikës, duke bërë kështu të qartë se mazhoranca do ta miratonte atë siç ka bërë në variantin fillestar.
/tesheshi.com/
