Ka mbërritur sot në Tiranë kreu i delegacionit të vëzhguesve të OSBE-ODHIR për zgjedhjet parlamentare, ku për herë të parë opozita ka refuzuar të marrë pjesë. Diplomati suedez dhe lidhjet e tij me Uashingtonin e vendet problematike të Lindjes së Mesme. Pse i është besuar një ‘neutrali’ sfida e ligjshmërisë së zgjedhjeve shqiptare këtë vit?
Sot OSBE ka bërë publik emrin e shefit të misionit ndërkombëtar që do të monitorojë zgjedhjet parlamentare në Shqipëri. Ai është Peter Tejler, i cili do të kryesojë delegacionin e vëzhguesve të OSBE-ODHIR për zgjedhjet e 18 Qershorit, zgjedhjet ndoshta më të vështira që nga viti 1996, ku për herë të parë pas 27 vitesh pluralizëm opozita ka refuzuar të marrë pjesë.
Tejler do të jetë nesër para gazetarëve në një konferencë për shtyp ku do të prezantojë funksionin e misionit dhe aktivitetin e tij.
Po kush është njeriu që do të çertifikojë ose do të rrëzojë zgjedhjet e këtij qershori që mbahen në një klimë të acaruar politike, kur opozita është në rrugë, ndërsa mazhoranca dhe disa parti të vogla janë në fushatë?
Karriera e tij diplomatike flet shumë. Tejler vjen nga Suedia, vendi neutral i luftrave botërore. Por, ai ka shërbyer si diplomat në vende të nxehta si Irani, Afganistani, Uzbekistani, në Afrikë dhe për pak kohë edhe në Uashington.
Një njohës i mirë i Lindjes së Mesme dhe shef i misioneve të ODIHR-it në vende problematike, Tejler, duket se nuk është një zgjedhje rastësore për Tiranën, përkundrazi është zgjedhja më e mirë që mund të bënte misioni i OSBE-ODHIR-it për Shqipërinë në këtë situatë.
Peter Tejler, diplomati i Lindjes së Mesme
Ambasadori Peter Tejler është aktualisht ambasadori i Suedisë në Republikën Islamike të Iranit. Karriera e tij e hershme diplomatike përfshin detyra në Pragë, Damask, Bon dhe në ministrinë e Punëve të Jashtme në Stokholm. Në vitin 1991 ai u emërua shef i Zyrës së Ministrit të Jashtëm në këtë ministri. Në vitin 1994 ai u mori detyrën si zëvendës/shef i Misionit suedez në Uashington DC.
Pas detyrës në Amerikë nis karriera e tij e vërtetë diplomatike në Lindjen e Mesme. Në vitin 1999 ai shkoi në Pakistan si ambasadori i Suedisë dhe që nga viti 2002 ai ishte gjithashtu ambasador jo-rezident në Afganistan. Gjatë viteve 2003-2008 ai shërbeu si Shef i Departamentit të Lindjes së Mesme dhe Afrikës Veriore në Ministrinë e Jashtme Suedeze. Ndërsa në vitin 2008 u emërua ambasador në Afrikën e Jugut dhe më vonë edhe ambasador jo-rezident në Botsvana, Namibi dhe Lesoto.
Në të njëjtën kohë, ai ishte përfaqësuesi i Përhershëm i vendit të tij në SADC. Që nga viti 2012 ai shërben si ambasador i Suedisë në Republikën Islamike të Iranit, detyrë që e nisi me një incident të vogël sipas mediave të Iranit. Gjatë takimit me presidentin Mahmoud Ahmadinejad, ai kryqëzoi këmbët, një veprim ky që merret për ofendim në kulturën islamike. Tejler ka ndikuar shumë në investimet suezede në Lindjen e Mesme. OSBE-ODIHR e kanë caktuar atë shef të misionit vëzhgues edhe në zgjedhjet presidenciale të Uzbekistanit, në fund të cilave ai nënvizoi reformat ligjore që duhej të ndërmerreshin që këto zgjedhje të arrinin standardet demokratike.
I ardhur nga vendi neutral i luftrave, Suedia, Peter Tejler vjen në fakt në gjirin e një ‘lufte’ politike shqiptare, ku netraliteti është po kaq i rëndësishëm. /tesheshi.com/
