Sot është 9 maj, ditë të cilën Evropa e ka si Ditën e Fitores mbi Fashizmin dhe Ditën e Evropës në kujtim të përfundimit të Luftës së Dytë Botërore në Evropë në vitin 1945 dhe fillimit të krijimit të Bashkimit Europian pesë vjet më vonë.
Me shifra, ky vit shënon 74-vjetorin e përfundimit të Luftës së Dytë Botërore dhe 69 vjet që nga fillimi i iniciativës për krijimin e Bashkimit Evropian të sotëm.
Këto dy ngjarje të rëndësishme në historinë e Evropës, si çdo vit, do të shënohen nga një seri manifestimesh dhe nderimi për viktimat e fashizmit, si dhe kujtesë për luftimet e ashpra në Luftën e Dytë Botërore.
Në vendet e BE-së, më e rëndësishme është Dita e Evropës, si një ditë që shënoi një pikë kthese në marrëdhëniet mes vendeve evropiane dhe hapi rrugën për një komunitet shtetesh në kontinent, ndërsa në Rusi fokusi është vetëm në festimin e Ditës së Fitores në Luftën e Dytë Botërore.
Institucionet e BE-së tradicionalisht hapin dyert për qytetarët më 9 maj dhe përfaqësitë eurpiane anembanë botës organizojnë aktivitete dhe tubime të ndryshme për qytetarët, siç janë debatet, koncertet dhe vizitat.
Në rafshin rajonal, Dita e Evropës përkon këtë vitit me samitin Brdo-Brijonit në Tiranë, një nismë e nisur me qëllim për të përshpejtuar integrimin e Ballkanit Perëndimor në BE.
Dita e Evropës është themeluar si një ditë e kujtimit mbi deklaratën e ministrit të jashtëm francez Robert Schuman në vitin 1950, e cila konsiderohet hapi i parë zyrtar në themelimin e BE-së.
Deklarata ishte propozimi i ish-armiqve, Francës dhe Gjermanisë, për të krijuar një organizatë që do të menaxhojnë bashkërisht qymyrin dhe çelikun në industritë e tyre, si një garanci ekonomike kjo që lufta në Evropë nuk do të përsëritet.
Propozimi çoi në krijimin e Komunitetit Europian të Qymyrit dhe Çelikut në vitin 1951, i cili ishte paraardhësi i Komunitetit Ekonomik Europian, ose BE-ja e sotme. /tesheshi.com/
