Italianët e tifozët e Italisë kudo që ndodhen, kanë filluar ta besojnë çdo ditë e më tepër se “shpresa vdes e fundit”. Një tjetër episod që ka dalë në media, i kanë bërë ata ta ngrenë disi kokën e ta ushqejnë me ç’të mundin shpresën e fundit.
Sipas një lajmi që po qarkullon në Peru, kombëtarja e këtij vendi që u kualifikua për në Botërorin e Rusisë, duke mundur në play off Zelandën e Re, mund të përjashtohet nga kampionati i më të mirëve, e t’ia lërë vendin një tjetër përfaqësueseje që ka pikë më shumë, e që në rast se kjo ndodh, me shumë gjasa do të jetë Italia.
Sipas mediave peruane, Kombëtarja e këtij vendi rrezikon Botërorin nëse miratohet një ligj i propozuar së fundmi, në bazë të të cilit, federata e këtij vendi kalon në varësi të shtetit, çka është rreptësisht e ndaluar nga FIFA.
Organi kryesor i administrimit të futbollit kudo në Botë, e ka në thelb të saj autonominë nga qeveritë e secilit shtet, ndaj nëse në Peru do të ndodhë që Federata të kalojë në varësi të qeverisë, mund të ndodhë edhe përjashtimi i Kombëtares nga evenimenti kryesor i futbollit. E nëse diçka e tillë ndodh pra, axurët mund të shpresojnë fort se do të jenë në Botëror.
Por nga ana tjetër, sapo kanë dëgjuar për një lajm të tillë, bastaxhinjtë kanë nxituar të kuotojnë Italinë, jo vetëm si pjesmarrëse, por edhe si fituese e mundshme e Botërorit, edhe pse në raportin 50 me 1.
Ndërsa përsa i përket skuadrave që janë kualifikuar, dhe basteve që vihen për fituesin e mundshëm të Botërorit të Rusisë, favoritet kryesore jepen Gjermania, Brazili dhe Franca, me koeficienin 6, të ndjekur nga Spanja 7.5 dhe Argjentina 9. /tesheshi.com/
