Në prag të zgjedhjeve të përgjithshme në Gjermani më 24 shtator, lufta verbale midis Ankarasë dhe Berlinit është duke u përshkallëzuar gjithnjë e më tepër.
Të premten, presidenti Erdogan përshkroi demokratët dhe socialdemokratët në pushtet në Gjermani, si dhe Partinë e Gjelbër, si “armiq të Turqisë”.
Erdogan u kërkoi 1 milion turqve etnikë të Gjermanisë të cilët do të votojnë, që të hedhin poshtë këto parti. “Kjo është një luftë nderi për të gjithë qytetarët tanë që jetojnë në Gjermani. Ata duhet të marrin një mësim”, tha ai.
Thirrja, siç dhe pritej, u kritikua nga qeveritarët gjermanë. Ministri i Jashtëm Sigmar Gabriel tha se thirrja “e paprecedent” e minoi sovranitetin gjerman. Erdogan ktheu goditjen dje kur tha se Gabriel duhet “të njohë kufijtë e tij”.
Erdogan tha: “Ai po përpiqet të na japë neve leksion. Cila është eksperienca juaj në politikë? Sa vjeç jeni ju? “
Kancelarja Angela Merkel e cila kritikoi Turqinë disa ditë më parë për burgosjen e gazetarëve dhe aktivistëve disidentë, reagoi nëpërmjet një deklarate në Twitter nga zëdhënësi i saj kryesor Steffen Seibert: “Lidhur me deklaratat e fundit të Presidentit Erdogan: Ne presim që qeveritë e huaja të mos ndërhyjnë në punët tona të brendshme”.
Merkel u zotua për të parandaluar nisjen e negociatave të modernizimit të bashkimit doganor me Turqinë. Gjermania kohët e fundit tërhoqi trupat e saj nga një bazë ushtarake në Turqinë jugore dhe i zhvendosi në Jordani, pasi Ankaraja refuzoi të lejonte ligjvënësit gjermanë të vizitonin forcat atje.
Partnerët kryesorë tregtarë dhe anëtarët e NATO-s kanë qenë në mosmarrëveshje,pasi Berlini refuzoi të lejonte politikanët turq të bënin fushatë në Gjermani për referendumin kushtetues të Turqisë në prill. Në reagim,
Partia AK në pushtet, akuzoi Gjermaninë për miratimin e praktikave naziste.
Janë 10 gjermanë, qoftë gazetarë apo aktivistë, të cilët janë në paraburgim në Turqi, një tjetër pikë grindjeje.
Talip Kuçukçan, kreu i Asamblesë Parlamentare të Këshillit të Evropës dhe një ligjvënës i AKP-së, tha se marrëdhëniet turko-gjermane kanë një histori të gjatë dhe të rrënjosur thellë.
“Unë besoj se racionaliteti dhe realizmi do të formësojnë të ardhmen e marrëdhënieve midis Turqisë dhe Gjermanisë”, tha ai. “Vëllimi i marrëdhënieve ekonomike, prania e një diasporë të madhe turke dhe partneriteti strategjik mbi migracionin dhe sigurinë do të dalin përpara dhe do të nxisin marrëdhëniet turko-gjermane”.
Skenari më i keq, tha Kuçukçan, është presioni i Berlinit për kompanitë gjermane që veprojnë në Turqi për të kufizuar investimet e tyre. “Por kjo mund të jetë e dëmshme për shkak të konkurrencës globale për tregjet turke, kështu që besoj se udhëheqësit e Turqisë dhe Gjermanisë nuk do të lejojnë një politikë humbjeje”, tha ai, duke shtuar se bota e biznesit dhe diaspora turke mund të luajnë një rol konstruktiv të ndërmjetësimit.
Kuçukçan tha se Ankaraja kurrë nuk do ta pranojë Gjermaninë si një partner për sa kohë që është një strehë e sigurt për anëtarët e organizatave terroriste si Partia e Punëtorëve të Kurdistanit (PKK) dhe lëvizja Gulen, që besohet të ketë qenë pas përpjekjes së dështuar të grushtit të vitit të kaluar ne Turqi. /tesheshi.com/
