Takimi katërorësh që uli në një tavolinë në Bruksel të dielën Turqinë dhe BE-në ka përfunduar në mënyrën më të mirë të mundshme.
“Një ditë historike dhe një takim historik” e ka cilësuar kryeministri turk Ahmet Davutogllu pikëpjekjen me udhëheqësit e 28 vendeve të BE-së dhe marrëveshjen që u arrit në të.
Sipas kësaj marrëveshjeje, të nxitur në kushtet e një administrimi tejet të vështirë të valës së pandalshme të refugjatëve drejt Europës, si dhe të një pozite të vështirë të Turqisë pas embargos thuajse tërësore ruse, BE-ja i akordon vendit euroaziatik tre miliardë euro ndihmë që do të shkojnë për refugjatët sirianë, e në të njëjtën kohë i jep një shtysë të re procesit të anëtarësimit të tij në bllokun europian.
“I pari takim i këtij lloji në 11 vjet,” do të thoshte Davutogllu, për të shtuar më pas, “Jam i lumtur të shoh se të gjithë kolegët e mi në Europë janë të një mendimi se Turqia dhe BE-ja kanë të njëjtin fat.”
Ai ka bërë të ditur se Turqia dhe BE-ja kanë rënë dakort të kenë çdo vit takime të përbashkëta, si dhe dialog të nivelit të lartë mbi energjinë. Po ashtu, në dhjetor të këtij viti do të hapet kapitulli i 17-të i procesit të pranimit të Turqisë në BE, që ka të bëjë me politikën ekonomike dhe monetare.
Një tjetër vendim historik i takimit të djeshëm është lëvizja e lirë e qytetarëve të Turqisë në vendet e Shengenit. Kështu, duke nisur prej tetorit të 2016-ës, turqit do të lëvizin në këto vende pa viza.
Për sa ka të bëjë me refugjatët, Davutogllu e bëri të qartë se ndihma ekonomike është për refugjatët sirianë, “Tre miliardë eurot nuk i janë dhënë Turqisë. Ato jepen për refugjatët sirianë.”
Turqia është pika kryesore e kalimit të refugjatëve sirianë për në Europë, si vendi në kufi me Sirinë, dhe marrëveshja parashikon frenimin e kontrollin më të plotë të vërshimit të tyre. Në të gjithë këtë proces, Turqia do të duhet të luajë një rol parësor në mbajtjen e këtyre refugjatëve në rajon.
Ashtu siç bëri të ditur dhe kancelarja gjermane Merkel para takimit, kur tha se marrëveshja mes BE-së dhe Turqisë do të ndihmojë në shtënien e vërshimit të refugjatëve në një kornizë ligjore. Me fjalët e saj, “Turqia po mirëpret mbi dy milionë refugjatë, e ka marrë pak mbështetje ndërkombëtare, kështu që ajo ka të drejtë të presë që BE-ja dhe shtetet e saj anëtare të ndihmojnë në përballimin e kësaj detyre.”
Presidenti i BE-së, Donald Tusk, e çmoi takimin e djeshëm si një pikë të re nisëse në marrëdhëniet mes BE-së dhe Turqisë. Për të, procesi i anëtarësimit të Turqisë në BE do të rinisë të bëjë përpara pas vitesh të tëra qëndrimi në vend.
Marrëveshja e djeshme ka qenë e domosdoshme për të dyja palët. Ardhja e dimrit, si dhe tejngopja e vendeve të BE-së me refugjatë e bënte të ngutshme gjetjen e një zgjidhjeje për vërshimin e tyre. Në kushtet aktuale, ndihma për Turqinë në shkëmbim të kontrollit e të administrimit të masës së madhe të refugjatëve në territorin turk u pa si zgjidhja më e mirë e mundshme. Sa ka të bëjë me Turqinë, marrëveshja me BE-në është një frymëmarrje në momentin e duhur pas presionit rus dhe ndërprerjes së gati çdo bashkëpunimi nga ana e Rusisë. /tesheshi.com/
