Presidenti amerikan Donald Trump është fajësuar nga kryetari i bashkisë së Charlottesville, për përleshjet e dhunshme midis supremacistëve të bardhë dhe grupeve kundërshtare me policinë në Virxhinia.
Kryebashkiaku Michael Signer tha se ishte i zhgënjyer pse nacionalistët e bardhë kishin ardhur në qytetin e tij dhe tha se përgjegjësia i takonte presidentit Trump për ndezje të paragjykimeve racore gjatë fushatës së tij presidenciale vitin e kaluar.
“Do të jem shumë i drejtpërdrejt lidhur me këtë. Për atë çfarë po shihni sot në Amerikë, unë e vë fajin në pragun e Shtëpisë së Bardhë dhe njerëzve rreth presidentit”, tha ai
Përleshjet shpërthyen gjatë një proteste mbi vendimin e qeverisë së qytetit, për të hequr një statujë të një gjenerali të konfederatës.
Presidenti Trump tani ka dhënë mesazhin e tij të parë, përmes së cilit dënon dhunën, disa orë pas fillimit të saj.
Në Twitter, përmes komenteve u akuzua presidenti se nuk ishte i drejtpërdrejtë, pasi ai nuk specifikonte nëse po i referohej supremacistëve të bardhë. Disa anëtarë të Klu Klux Klan iu bashkuan protestës, duke goditur me grushta dhe përdorur sprej mbi personat në turmë.
Trump është akuzuar në mënyrë të përsëritur se ka nxitur tensionet racore në vend, përmes retorikës së tij mbi emigrantët dhe premtimin e tij për ndërtimin e një muri midis SHBA dhe Meksikës.
Zyrtarët në Charlottesville shpallën gjendjen e emergjencës pak kohë pas orës 11:00, ndërkohë që dhuna u përkeqësua.
Këto përleshje janë të fundit në qytetin, e vendosur rreth 100 milje nga Uashington DC, i cili votoi për heqjen e statujës së gjeneralit Lee nga parku. /tesheshi.com/
