Miell dhe vota, LSI dhe PD, Ministria e Bujqësisë kundër një biznesmeni të madh, i cili është kryetar i bashkisë së Vorës prej 3 mandatesh.
Ministria e Bujqësisë ka pezulluar aktivitetin e një fabrike mielli në ronësi të kreut të Bashkisë së Vorës, Fiqiri Ismaili, por ky vendim ka shkaktuar një reagim të fortë si të kompanisë ashtu edhe të Partisë Demokratike, ku për herë të parë prej dy vitesh kanë nxjerrë në foltoren e PD-së deputeti Astrit Patozi.
Plot 100 ton miell të kompanisë “Agroblend” dhe 6800 ton lëndë e parë grurë janë bllokuar nga Autoriteti Kombëtar i Ushqimit me pretendimin se nuk plotësonin kushtet higjieno-sanitare dhe dokumentacionin shoqërues, por kanë rezultuar edhe me prezencë të aflatoxin.
Gjithashtu ndaj subjektit Agroblend u mor masa administrative gjobë në vlerën 400 000 lekë.
Kompania “AGRO BLEND”ka reaguar menjëherë duke e cilësuar si të pavërtetë lajmin se në miellin e kompanisë është gjendur përbërësi i ndaluar aflatoxin. Sipas kësaj kompanie bëhet fjalë për luftë politike të pastër. LSI garon në Vorë një kandidat të sajin, Luan Sallakun dhe po zhvillon një fushatë agresive për ta marrë këtë bashki të rëndësishme pranë kryeqytetit.
Deputeti Astrit Patozi, ish-deputet i kësaj zone para 8 vitesh e ka cilësuar këtë ngjarje si një “sulm mafioz”
“Strukturat mafioze të LSI-së në qeveri shënuan sot një sulm të ri ndaj zgjedhjeve të lira në Bashkinë e Vorës, duke vënë në shënjestër direkt kandidatin e opozitës, Fiqiri Ismaili. Të gjithë ne e dimë se administrata shtetërore e ka pushim të shtunën dhe të dielën, por kjo me sa duket nuk vlen për horrat e LSI-së në qeveri, të cilët punojnë në mënyrën e tyre, me bllok në dorë. Goditja e biznesit të zotit Ismaili vjen pas një vale presioni mbi të gjitha sipërmarrjet private, që ushtrojnë aktivitetin e tyre në zonën e bashkisë së Vorës, dhe pas trysnisë që po ushtrojnë forcat e policisë dhe elemente kriminale mbi aktivistet e Partisë Demokratike”, tha Patozi.
Partia Demokratike e konsideron këtë si një ndërhyrje të pastër të mafies qeveritare për të prishur zgjedhjet e 21 qershorit dhe për të deformuar vullnetin e shqiptarëve. Ajo kërkon ndërprerjen e menjëhershme të kësaj fushate të shpifur presioni dhe terrori shtetëror, që po ushtrohet prej ditësh në gjithë territorin e bashkisë së Vorës, duke paralajmëruar të gjithë abuzuesit se do të vihen rreptësisht para përgjegjësisë. Ndërsa sulmi mbi kandidatin Ismaili dhe çdo rast tjetër i ngjashëm do të vihet në dispozicion të misionit të vëzhguesve të OSBE-ODIHR-it në Tiranë.
