Akuzave ndaj Lëvizjes Socialiste për Integrim që vijnë nga Pogradeci e Mallakastra e që bëjnë fajtore këtë parti për humbjen e bashkive, Ilir Meta u është përgjigjur nga tubimi i të rinjve të LRI-së në Jalë.
“Rezultati më i shkëlqyer u arrit në qytetet më të mëdha të Shqipërisë falë punës së LRI –së dhe sidomos në Tiranë, ku LRI –ja ishte ajo që drejtoi fushatën”, theksoi Meta.
Së fundmi, ai ka mohuar “ftohjen” e marrëdhënieve në koalicion me PS-në, por faktet mbeten të njëjta, baza socialiste ka fajësuar LSI-në për humbjen e bastioneve në zgjedhje.
Vetëm një ditë pasi Artan Shkëmbi ia faturoi humbjen në Pogradec LSI –së, ndërsa më pas ishte kryetari i PS-së në Mallakastër, Pajtim Ismaili që e trajtoi kandidaturën e LSI-së për këtë bashki si shkak të humbjes.
Kryetari i bashkisë së Pogradecit për 3 mandate radhazi, Artan Shkëmbi kishte deklaruar më herët se shkak për rezultatin humbës në këtë bashki ishte kandidatura e dobët e përzgjedhur dhe organizimi i dobët i fushatës. Kandidatja e LSI, Diana Mile, nuk ka vonuar për të akuzuar PS-në se ka bërë pazare me PD.
LSI doli me skenarin e “pazareve” pas humbjes së kandidatëve të saj në disa bastione të majta pas zgjedhjeve, e këto dyshime për Pogradecin, por edhe Lezhën e Vorën, janë një nga shkaqet e “ftohjes” Rama-Meta. /tesheshi.com/
