Tashmë në Partinë Demokratike ka nisur pjesa e dytë e luftës së brendshme.
Pas sigurimit të mandatit të kryetarit, Lulzim Basha ka filluar që të heqë rrezikun potencial të njerëzve të brendshëm brenda grupit parlamentar, të cilët mund të mos jenë luajal.
Ndërkohë, pjesa tjetër e betejës pritet të jetë përballja me këshillin kombëtar, ku mbështetës të ish-ryeministrit Sali Berisha kanë bërë gati ndryshime statutore që nuk i leverdisin kryetarit në fuqi.
Sinjali i parë i luftës ka ardhur nga dy kryetarë aleatë, të cilët kryetari i PD-së i vuri në listat fituese të kësaj partie, por që menjëherë pas zgjedhjes si deputetë, nisën bombardimin ndaj Bashës.
I pari ishte Fatmir Mediu, i cili u ndoq nga Dashamir Shehi.
Mediu, arriti deri aty sa i afroi një dekalog Bashës për të ribashkuar PD-në. Pra në kushtet kur terreni për partitë e vogla ka vdekur, kreu i republikanëve bën gati fuzionin me partinë e madhe.
Të njëjtën listë ndoqi dy ditë më parë edhe Dashamir Shehi, kreu i LZHK-së dhe personash kontraversal i së djathtës shqiptare.
Shehi sulmoi Bashën për qëndrimin e ministrave teknikë në qeverinë e Edi Ramës, duke akuzuar Bashën për një pakt jo të hapur me kryeministrin shqiptar.
Por menjëherë ka reaguar Basha, nëpërmjet njeriut të tij të besuar, apo “Endri Fugën e selisë blu”, që është drejtori i komunikimit në PD, Edi Lesi.
Këshilltari i Bashës, ka sulmuar menjëherë krerët e partive aleate duke i kujtuar se kanë kryetarë prej 25 vjetësh.
“Jane shfaqur ca aleatë që japin receta ç´duhet të bëjë PD, pak të thuhet si zonja Tefta që tregon si gatuhet bifteku dhe ca vlerash kanë zarzavatet në verë. Më shumë ngjajnë me dermatologët që të mësojnë si dielli i mesdites duhet shmangur. Predikime banale pa asnje të re, pa asnjë ide, ndërkohë që leksioni i vetëm që mund të jepnin është t´i kishin hapur rrugë lidershipit të ri në partitë e tyre që i mbajnë në xhep, si orët e qëmotit, prej më shumë se dy dekadash”, shkruan Lesi.
Një vëzhgim që do të ishte mjaft i frytshëm nëse nuk do të ishte po Lulzim Basha që thelbin e luftës politike në vitin e fundit e zhvilloi pikërisht me këta krerë partish të vogla, me të cilët zëvendësoi edhe Këshillin Kombëtar.
Por e gjithë arsyeja e kësaj lufte të brendshme është vetëm një; Lulzim Basha nuk varet më nga numrat. Ai edhe pse ka një grup të vogël parlamentar, në bazë të marrëveshjes së 18 majit do të jetë realisht një peshë e madhe specifike për të kushtezuar të gjitha reformat e mëdha.
Madje si shenjë garancie do të ketë edhe njerëzit e tij në ekzekutivin e Edi Ramës.
Ndoshta jo me postë ministrash por Sekretarësh Shteti apo Kryeinspektorësh. Dritan Demiraj është kandidati i parë i kësaj bashkëqeverisjeje alla shqiptare.
Bashës i duhen të paktën 30 deputetë, siç edhe Ramës vetëm 65 për të bërë reformat kushtetuese.
Pra realish pesha specifike e aleatëve si Shehi, Mediu apo edhe Agron Duka ka rënë shumë. E ardhmja e tyre nuk premton, ndaj po bëjnë presion. Të cilëve Basha iu përgjigj duke mos denjuar as të flasë personalisht.
Por beteja më e vështirë për Lulzim Bashën do të jetë Këshilli Kombëtar.
Një grup shumë afër ish-kryeministrit Sali Berisha ka propozuar ndryshime në statut që për postin e kryetarit të ketë zgjedhje çdo dy vjet me dy mandate nga katër vjet.
Ndërkaq, klani anti-Basha që kanë propozuar 11 ndryshime, synojnë që t’i kufizohet mandati kryetarit kur ai humbet zgjedhjet.
Se cili nga propozimet do të mbështetet, kjo do të varet nga grupi pro Berishës, i cili dominon në Këshillin dhe Kuvendin Kombëtar. Mbështetësit e Sali Berishës në PD do të luajnë një rol vendimtar për miratimin e 11 propozimeve të reja në statut.
Nëse Berisha me njerëzit e tij do të mbështesin projektin e ri në shtator, atëherë, Lulzim Basha realisht nuk do të ketë fuqi të madhe.
Megjithatë, Basha ka grupin parlamentar dhe ministrat teknikë, të cilët kanë punësuar mjaft anëtarë të Këshillit në dikastere e drejtori të ndryshme për të krijuar një influencë.
Pjesa dërrmuese e Këshillit Kombëtar, i cili përbëhet nga 150 anëtarë, janë individë që kanë punuar me Sali Berishën. Nëse kundërshtarët e Bashës do të gjejnë mbështetjen e grupit të Berishës, sigurisht që statuti i ri do të miratohet shumë lehtë.
Një tjetër propozim i grupit anti-Basha është edhe ndalimi i marrëveshjeve politike me Edi Ramën.
Ja ç’thotë propozimi i ndryshimeve në statut”:“Ndalimin e çdo marrëveshjeje për bashkëqeverisje me kundërshtarin politik pa vendimmarrjen e organit më të lartë të partisë, Kuvendit Kombëtar.
Krijimin e gjykatës së partisë me përbërje edhe të figurave historike të partisë, për kontrollin formal të vendimmarrjes së organeve të të gjitha niveleve të Partisë”.
Basha realisht ndodhet i rrethuar nga katër anë; Berisha, grupi i Astrit Patozit, aleatët, por edhe LSI e Ilir Metës
I vetmi shteg ikje është ai ku sheh Edi Ramën dhe ndërkombëtarët…
/tesheshi.com/
