Athina zyrtare ëshët shfaqur e tronditur një ditë pas përmendjes së “çështjes çame” nga komisioneri Hahn gjatë një raportimi të tij në parlamentin europian. Sipas raportimit të Top Channel, kreu i diplomacisë greke Nikos Kotzias, i ka kërkuar diplomatit të rëndësishëm të Brukselit që të tërheqë deklaratën e tij dhe ta korrigjoje atë, duke thënë se Hahn ka shkelur kompetencat e tij duke ndërhyrë në punët e vendeve anëtare duke çelur debate për çështje që nuk ekzistojnë.
“Deklarata e komisionerit Johanes Hahn është e pavërtetë dhe e papranueshme. Siç dihet, çështja çame është inekzistente dhe si e tillë, kurrë nuk është pranuar si objekt negocimi, midis qeverive të Greqisë dhe Shqipërisë. Komisioneri Hahn, me përgjigjen e tij të gënjeshtërt, tregon se nuk ushtron rolin dhe detyrat e tij në bazë të parimit të asnjëanësisë, në mënyrë që të avancohet interesi i përbashkët i unionit, siç parashikohet në nenin 17 të Konventës së Lisbonës. Që tani i është kërkuar dhe është i detyruar në bazë të rolit të tij institucional të japë shpjegime të menjëhershme, bindëse përsa i përket përmbajtjes së papranueshme dhe të gënjeshtërt, të përgjigjes së tij të kontestuar”.
Kjo pra ka qenë deklarata e Athinës, tejet e drejtpërdrejt, e ashpër, madje dhe kërcënuese, gjë që tregon sesa e ndjeshme është ajo kur bëhet fjalë për çështjen çame. /tesheshi.com/
