Ministria e Mbrojtjes thotë se po përmirësohet situata e përmbytjeve në qarkun e Shkodrës, pasi niveli i ujit ka rënë me rreth 30 cm krahasuar me një ditë më parë. Megjithatë, në zonë gjendja është e rëndë, pasi edhe vetë ministria e Mbrojtjes thotë se do të dërgojë ushqime për bagëtinë, ndërkohë që banorët, shtëpitë e të cilëve, mbeten të rrethuara nga uji, vijojnë përditshmërinë të ndihmuar nga mjetet e ushtrisë.
Ndërkohë bashkia Shkodër thotë se pas inspektimit të bërë në njësitë administrative sipërfaqja totale e tokave të përmbytura është reduktuar në 4155 hektarë.
Momentalisht, sipas të dhënave të ofruara nga Bashkia, 55 persona janë akomoduar në konvikt. Gjithashtu, Bashkia e Shkodrës thotë se ka bërë të mundur edhe lëvizjen e banorëve dhe akomodimin e tyre tek të afërmit si dhe ka shpërndarë pako ushqimore.
Bashkia ka bërë një shkresë publike drejtuar ministrisë së Mbrojtjes ku ka kërkuar shpalljen e gjendjes së emergjencës civile në këto njësi pasi rrezikohet rëndë shëndeti dhe jeta e popullatës, gjësë së gjallë, pasurisë e mjedisit. Por, Bashkia thotë se edhe pse kjo kërkesë është përsëritur disa herë, akoma nuk ka një përgjigje zyrtare nga autoritetet përgjegjëse. /tesheshi.com/
