Koha e keqe ka përfshirë disa zona në kontinentin Europian. Përmbytjet janë ndier më së shumti në Itali e Francë.
Kohë e keqe në Itali, 2 të vdekur
Koha e keqe ka shkaktuar dëme veçanërisht në veri të Italisë, në provincën e Brescias dhe të Trentos. Si pasojë e motit të keq, mjaft rrugë kryesore dhe dytësore janë mbyllur gjatë pasdites së djeshme. Të shumta kanë qenë ndërhyrjet e forcave zjarrëfikëse dhe të mbrojtjes civile, ndërsa burime zyrtare nga shteti italian bëjnë me dije se situata është nën kontroll dhe pritet përmirësimi i saj.
Një stuhi e fuqishme me erë të fortë ka paralizuar të premten pasdite edhe Triesten. Si pasojë, mjaft shtëpi e dyqane janë përmbytur, pemët kanë rënë në tokë, si dhe kanë ndodhur aksidente të vogla rrugore. Sipas zyrës së zjarrëfikësve ‘situata po kthehet në normalitet’.
Cikloni i ardhur nga Atlantiku ka pushtuar disa prej zonave në Veri të Italisë ka shkaktuar 2 viktima. Në zonën e Varesotto-s mëngjesin e së dielës kanë ndërhyrë rreth 70 zjarrfikës për të mbajtur situatën nën kontroll. Në sallën operative kanë mbërritur rreth 350 kërkesa për ndihmë.
Koha e keqe ka prekur edhe Expo Milano, ku koha e keqe u ka krijuar probleme vizitorëve .
Kohë e keqe në Zvicër
Erëra të forta kanë përfshirë pasditen e djeshme veriun e Alpeve. Të prekura më së shumti janë Seeland, mes kantoneve Friburgo, Neuchâtel dhe Bernës. Gjatë së njëjtës kohë, nga moti i keq është goditur edhe Zvicra lindore.
Dy linja hekurudhore kanë ndalur së funksionuari. Është bllokuar linja mes Kerzers e Ins, ku për disa orë qarkullimi është bërë me autobusë zëvendësues ndërsa në Zvicrën lindore ka ndalur së funksionuari linja Weinfelden (TG)-Gossau (SG) mes Sulgen e Kradolf.
Shqetësime të mëdha ka pasur edhe trafiku në autostradën A1, e cila është përmbytur në zonën e Wil dhe është mbyllur për shkak të dëmeve të pasuar në pjesën e rrugës nga Münchenwilen në Utzwil. Hapja e saj është bërë rreth orës 5 të mëngjesit të sotshëm. /tesheshi.com/
