Shëndetësia shqiptare nuk resht së furnizuari me “perla” nga më të ndryshme, përdor lajle- lule dhe nisma që ngjajnë si në vendet skandinave, ndërkohë që shërbimi që ofrohet është me keq se vendet e pazhvilluara të botës së tretë.
Më e fundit ka ndodhur në Spitalin Universitar të Lindjes “Koço Glozheni”, ai që në gjuhën popullore quhet Materniteti i ri.
Një pllakat në portën kryesore të Maternitetit njofton qytetarët se ata mund të bëjnë një analizë që quhet e rëndësishme për fëmijët e sapolindur, por jo në spitalin në fjalë dhe jo në sektorin publik…por në një klinikë private në Tiranë, përkatësisht Spitalit me pronësi greke “Hygea”.
Në fakt nëse shikoni këtë reklamë, ju “nuk keni parë gjë akoma”, pasi në maternitet, një mjeke e pajisur me bllok dhe disa fletëpalosje, i shpjegon prindërve të rinj dhe të mbushur me emocione të përziera për foshnjat e sapolindura, për çfarë duhet bërë dhe sesi duhet bërë këto analiza.
Natyrisht duke përsëritur frazën “nëse dëshironi”. Por a mund ta bëjë një institucion publik, reklamën komerciale të një subjekti tërësisht privat dhe me çmime të ekstraliberalizuara, ku për një vizitë “të kripin” duke të bërë kontrollin e të gjithë indeve të trupit duke të “matur kokën me spango”.
Një subjekt privat mund ta bëjë reklamën ku të dojë, duke paguar edhe hapësirën publike dhe mediatike, por jo në institucionet publike. Kjo nuk ndodh në asnjë vend të botës, madje as botës së tretë…/tesheshi.com/
