Presidenti amerikan, Donald Trump, për të parën herë do të kryesojë ceremoninë për 11 Shtatorin, një ngjarje ceremoniale me të cilën përkujtohen 3 mijë njerëzit e vrarë, kur rrëmbyesit e aeroplanëve goditën Qendrën Tregtare Botërore, Pentagonin dhe një hapësirë në Pensilvani.
Shtëpia e Bardhë ka njoftuar se presidenti Trump dhe bashkëshortja e tij, Melania Trump, do të mbajnë një minutë heshtje në Shtëpinë e Bardhë, pak para orës 9 të mëngjesit, sipas kohës në Nju Jork, që ishte ora kur aeroplani i parë goditi Kullat Binjake të Qendrës Botërore të Tregtisë, më 11 Shtator të vitit 2001.
Presidenti dhe zonja e parë, po ashtu, do të marrin pjesë në ceremoninë në Pentagon, e cila udhëhiqet nga sekretari i mbrojtjes, Jim Mattis, dhe gjenerali Joseph Dunford, që është shef i shtamadhorisë së Forcave të Armatosura të Shteteve të Bashkuara.
Zëvendëspresidenti amerikan, Mike Pence, do të përfaqësojë administratën Trump gjatë përkujtimit të sotëm në Shamksville të Pensilvanisë.
Para tri ditësh, para shënimit të 16 vjetorit të sulmeve terroriste kundër Shteteve të Bashkuara, presidenti Trump shpalli periudhën prej 8 e deri më 10 shtator, si “Ditët e Përkujtimit dhe Lutjes”, ndërsa 11 Shtatorin “Ditën e Patriotizmit”. /tesheshi.com/
