Masakra e 2 prillit në Shkodër është shndërruar këtë vit në funksion të drejtpërdrejtë të politikës së ditës. Nëse në vite thjesht janë përkujtuar katër viktimat e asaj dite, pa patur deklarime te forta e të politizuara, këtë vit ka qenë ndryshe, ashtu siç risi ishte organizimi i një proteste nga ana e PD-së, gjë që nuk kishte ndodhur asnjëherë në 24 vite.
Kryetari i opozitës Lulzim Basha është treguar i ashpër në gjuhë, kur tha se: Të fillojmë që këtej pranverën e shpresës dhe të shporrjes së Ilir Metës dhe të Edi Ramës. Protestat popullore masive po zhvillohen qytet më qytet. Mijëra shqiptarë janë bashkuar kundër qeverisë Rama-Meta që i ka hedhur lakun në fyt shqiptarëve. Shkodra është e përbashkuar sot, për 4 djemtë e Shkodrës, për Arben Broci, Bujar Bishanaku, Nazmi Kryeziu dhe Besnik Ceka.
Të cilët u vranë pabesisht me armë zjarri nga godina e kryesisë së komiteti të Partisë. I përjestshme qoftë kujtimi i tyre. Ata i kemi mes nesh me ëndrën e madhe për një Shkodër zonjë dhe Shqipëri zonjë.
Shkodra është dhe pika më e nxehtë e zgjedhjeve të pritshme lokale. Për herë të parë pas, mazhoranca e majtë do tentojë ta fitojë si qytet, duke e thyer si bastion të së djathtës. Për këtë arsye, ka dhe një “akt diversionist” në përzgjedhjen e emrit që do kandidojë: Keti Bazhdari, e ardhur nga shtresa e të përndjekurve politikë. /tesheshi.com/
