Në Turqi është përkujtuar sot 102-vjetori i betejës së Çanakalasë, i fitores që ndryshoi rrjedhën e Luftës së Parë Botërore. Ceremoni të shumta e kanë përcjellë këtë përkujtim të kësaj fitoreje, mes të cilave ka qenë dhe ajo për përurimin e nisjes së punimeve të urës “Çanakala 1915”.
“Në dashtë Zoti, ne do ta shohim hapjen e kësaj ure pas pesë vitesh. Kjo urë do të bëhet numri një në botë, ndërsa ne lidhim Azinë me Europën, e në të kundërt. Eshtë shumë e rëndësishme të dihet se ç’lloj suksesesh kanë sjellë për ne besimi dhe vendosmëria e dëshmorëve tanë të Çanakalasë.”
Ishin këto fjalët e presidentit turk në një prej ceremonive të sotme, ndërsa përurohej fillimi i një tjetër vepre të madhe në serinë e shumë të tillave të ndërtuara në këto vite në Turqi.
Rexhep Tajjip Erdogani shprehu mirënjohje për të rënët e Çanakalasë, duke thënë njëkohësisht se ata që u ngritën kundër përpjekjes për grusht shteti të 15 korrikut të vitit të shkuar vepruan në një frymë të ngjashme me atë të të parëve të tyre një shekull më parë.
Shtetari më i lartë turk nuk la pa përmendur në fjalën e tij referendumin e 16 prillit mbi ndryshimet kushtetuese. Ashtu si ngahera, ai sqaroi se me këto ndryshime synohej garantimi i qëndrueshmërisë dhe i sigurisë në vend, çka do ta bënte Turqinë të renditej mes ekonomive më të mëdha të botës.
“Nëse synojmë të jemi mes dhjetë ekonomive kryesore, kemi nevojë për një sistem përmes të cilit të mund të konkurrojmë me këto vende,” theksoi Erdogani.
Në këtë kuadër, ai iu kthye rishtas çështjes së dënimit me vdekje, duke premtuar rikthimin e tij.
“Familjet e dëshmorëve, heronjtë (e puçit të dështuar të 15 korrikut) nuk duhet të shqetësohen. Besoj se pas votimit të 16 prillit, parlamenti do të bëjë ç’është e nevojshme në lidhje me kërkesat tuaja për dënimin kapital.”
“Unë do ta miratoj atë pa asnjë ngurrim,” premtoi Erdogani.
Në një ceremoni paralele, kryeministri Binali Jëlldërëm, duke folur mbi nisjen e punimeve të urës “Çanakala 1915”, deklaroi se, “Me këtë projekt të madh po i shpallim botës nga Çanakalaja realitetin e forcës së Turqisë, e madhështisë së Turqisë.” /tesheshi.com/
