Presidenti serb Aleksandar Vuçiç ka biseduar në telefon me Sekretarin amerikan të Shtetit, Antony Blinken, për situatën në Kosovë, rrugën evropiane të Serbisë dhe marrëdhëniet bilaterale mes dy vendeve, transmeton Anadolia, duke cituar një deklaratë nga zyra e presidentit serb.
Në një deklaratë të veçantë për kanalin N1, ambasadori amerikan në Serbi, Christopher Hill, tha se marrëdhëniet e Serbisë me Rusinë po dobësohen dita-ditës, ndërsa në të njëjtën kohë po rritet interesimi për bashkëpunim me BE-në dhe SHBA-në.
Hill tha se qëndrimi i SHBA-së është se Serbia duhet t’i bashkohet sanksioneve kundër Rusisë, duke thënë se nuk është e vërtetë që Beogradi nuk ka bërë asgjë, pasi në Kombet e Bashkuara dënoi agresionin rus kundër Ukrainës, transmeton Beta.
Sipas një komunikate të kabinetit të Presidentit të Serbisë, Vuçiç dhe Blinken shkëmbyen mendime për dialogun ndërmjet Serbisë dhe Kosovës dhe “Vuçiç theksoi veçanërisht se paqja dhe stabiliteti në të gjithë rajonin dhe e ardhmja e sigurt ekonomike janë synime kyçe për të gjithë ata që jetojnë në Ballkanin Perëndimor”. /tesheshi.com/
