Përjashtimi i deputetit Edi Paloka për 5 ditë nga punimet në parlament ka sjellë reagimin zyrtar të Partisë Demokratike. Ky vendim u miratua ditën e sotme (e hënë) me votat e socialistëve, nga Byroja e Kuvendit, pas incidentit të seancës së fundit parlamentare, ku Paloka shtyu në foltore ministrin e Shëndetësisë, Ilir Beqaj.
Përmes sekretarit të përgjithshëm të Partisë Demokratike, Arben Ristani, opozita thotë se qëndrimi i Palokës është reflektim i revoltës së popullit.
“Reagimi i Edi Palokës është thjesht shprehja, pasqyrimi i revoltës së popullit për këtë simbol të hajdutërisë dhe abuzimit. Populli është në revoltë ndaj Beqës, ndaj Ramës, dhe ndaj kusarëve të tij. Siç doli sot në rrugë dhe tentoi t’i bllokojë rrugën drejt zyrës ku ndan konçesionet dhe milionat me klientët e tij. Cfarë do bëjë byroja, ka ndërmend të përjashtojë popullin?”, tha Ristani, në një deklaratë për shtyp.
Ai thotë se ministri Beqaj tentoi të vjedhë fjalën në parlament, ashtu siç vepron edhe me tenderat dhe fondet e shëndetësisë. “Pasi ka vjedhur miliona euro në shëndetësi, pasi ka vjedhur miliona euro me firmën e tij private, që kap çdo tender të qeverisë, pasi trafikon vendet e punës sipas interesit personal dhe të partisë, Ilir Beqja, kampioni i korrupsionit të Edi Ramës, tentoi të vjedhë dhe fjalën në parlament”, përfundoi Ristani./tesheshi.com
