Prova e parë e kombëtares shqiptare ka kaluar pa ndonjë surprizë, përjashtuar një gol të pësuar në minutën e parë, por të zhvlerësuar me kalimin e minutave.
Ndaj një kundërshtari modest si Katari, 90 minutat kanë shërbyer më tepër si një eksperiment, me disa ndryshime në formacionin e zakonshëm.
Ndeshja në Hartberg është përcjellë nga mbështetës të shumtë të kuqezinjve. Trajneri De Biasi e nisi lojën me skemën 5-4-1, duke hedhur këtë njëmbëdhjetëshe në fushë: Berisha, Lila, Hysaj, Mavraj, Aliji, Ajeti, Lenjani, Gashi, Basha, Roshi, Cikalleshi.
Abdelkarim Hassan e ka kaluar në epërsi Katarin që në minutën e parë. Pak u është dashur lojtarëve tanë që ta marrin veten pas kësaj goditjeje të pamenduar. Edhe pse jo me harmoninë e zakonshme në lojë, barazimi vjen shpejt. Arlind Ajeti barazon në minutën e 23-të.
Në zotërim të plotë të lojës, goli i avantazhit është realizuar nga Lenjani pesë minuta para mbylljes së parë.
Gjashtë ndërrime pasojnë në ekipin e kuqezinjve. Agolli, Balaj, Cana, Rashica, Sadiku e Shala do të kenë minutat e tyre në fushë.
Nga këmbët e një zëvendësuesi, Armando Sadikut, vjen dhe goli i tretë. Në minutën e 64-t ai gjuan fort nga jashtë zonës dhe thellon rezultatin.
Pavarësisht rasteve të mëpastajme, shifrat nuk ndryshojnë. Shqipëria fiton 3-1.
Miqësorja e ardhshme është ndaj Ukrainës më 3 qershor. /tesheshi.com/
