Nga Musa Mustafa
Ndeshja e pritshme e futbollit mes Shqipërisë dhe Serbisë, më 8 tetor në ‘Elbasan Arena’ ka bërë që masat e sigurisë të jenë në maksimum. Por kjo jo vetëm rreth e rrotull stadiumit, në qytetin e Elbasanit apo më gjerë, gjithsesi brenda territorit shqiptar; këto masa do kalojnë dhe kufijtë zyrtarë pasi do përfshijnë dhe Urën e Ibrit në Mitrovicë, qindra kilometra larg, simbol i ndasisë e njëherit urrejtjes mes shqiptarëve dhe serbëve.
Policia e Kosovës ka paralajmëruar se për të enjten do të këtë një plan të posaçëm operativ për të dy anët e ‘Urës’, duke mos lejuar askënd që t`i afrohet asaj, si nga ana e jugut e si nga skaji tjetër, ana e veriut.
Konfirmohet kjo për tesheshi.com nga një burim konfidencial brenda strukturave policore të Mitrovicës.
Deri diku, kjo është konfirmuar dhe nga zëdhënësi i Policisë së Kosovës për rajonin e Mitrovicës, Avni Zahiti, që i ka thënë portalit tesheshi.com, se: “Policia e Kosovës ka një plan operativ për të enjten, si dhe do të ketë shtim të numër të policëve që do të kujdesen për sigurinë e qytetarëve”.
Zahiti, nuk ka dashur të komentoje rreth planit në fjalë, detajeve të veçanta siç është ajo e moslejimit që t`i afrohen asaj nga dy skajet, por thjesht ka pohuar të ketë një një plan.
“Policia e Kosovës është e gatshme që qytetarëve të saj, si në jug ashtu edhe në veri, t`iu ofrojë siguri”, ka thënë zëdhënësi Zahiti.
Por Zahiti gati e ka konfirmuar dhe detajin e ‘Urës’, kur ka pohuar se policia ka këshilluar banorët e Mitrovicës nga të dya anët që pa marr parasysh epilogin e takimi në ndeshjen Shqipëri-Serbi, të mos i ofrohen Urës së Ibrit, spse policia nuk do të lejojë një gjë të tillë.
“Nëse qytetarët dëshirojnë të festojnë, atëherë atë munden ta bëjnë atë në ambiente të tjera publike të qytetit e jo në afërsi të Urës duke provokur palën tjetër”, ka thënë Zahiti.
Ndërsa një zyrtar i institucioneve ndërkombëtare të sigurisë në Kosovë, duke parë tensionin e krijuar para takimit, është shprehur se nuk dihet se ku do jetë më e “nxehtë” situata atë ditë, në ‘Elbasan Arena’ apo në Urën Ibrit.
“Organet e sigurisë, duke filluar nga Shërbimi Intelegjent i Kosovës AKI, Policia e Kosovës, pastaj KFOR-it e EULEX-i, kanë rritur ditëve të fundit gjendjen e gadishmërisë si dhe shkëmbimin e informacioneve rreth lëvizjeve të grupeve të tifozëve dhe personave të caktuar në Mitrovicë dhe rreth saj”, ka thënë zyrtari në fjalë.
“Duhet të jemi të qartë se ndeshjet e ndryshme sportive që kanë ndodhur nëpër botë ku kanë qenë të implikuar ekipet serbe, kanë sjellë tension dhe prishje të rendit e qetësisë në Mitrovicë”, ka thënë zyrtari ndërkombëtar dhe ka shtuar se ndeshja e fundit në mes të Serbisë dhe Shqipërisë në Beograd e cila u ndërpre, është menaxhuar mirë nga policia e Kosovës, duke evituar në tërësi incidentet ndëretnike tek Ura e Ibrit.
Për kujtesë është sjellë një ndeshje basketbolli në mes Serbisë dhe Turqisë pak kohë më parë, ku për pasojë pati shpërthim dhune tek Ura e Ibrit, mes palëve që mbështesnin njëra Turqinë e tjetra Serbinë. Kjo bëri që KFOR-i dhe Policia e Kosovës të ndërhynin deri me gazi lotësjellës për të shpërndarë turmat. /tesheshi.com/
