Pentagoni ka reaguar nëpërmjet zëdhënësit të vet për cilësimin e SHBA-ve si kërcënim për Rusinë në dokumentin e rishikuar të strategjinë së sigurisë kombëtare dhe të nënshkruar nga presidenti Putin.
Rusia nuk ka arsye t’i konsiderojë SHBA-të si një kërcënim për sigurinë kombëtare, ka qenë thelbi i fjalës së zëdhënësit të Pentagonit.
“Ata nuk kanë arsye të na konsiderojnë një kërcënim,” ka thënë Jeff Davis para gazetarëve.
“Ne nuk po kërkojmë konflikt me Rusinë,” ka nënvizuar ai. “Ne kemi dallime, por është krejtësisht e gabuar t’i shohësh Shtetet e Bashkuara si kërcënim për Rusinë.”
Strategjia e Sigurisë Kombëtare, një dokument i rishikuar çdo gjashtë vite dhe që parashtron përparësitë e Rusisë në kuadër të sigurisë, i ka paraqitur SHBA-të dhe NATO-n si kërcënim. Dokumenti i mëhershëm, i 2009-ës, nuk i përmend as njërën e as tjetrën.
Rusia dhe SHBA-të ndajnë pikëpamje të ndryshme për konfliktet në Siri dhe në Ukrainë, e në këtë kuadër marrëdhënia mes tyre është me ulje e ngritje, e përkeqësuar shpeshherë. /tesheshi.com/
