Pentagoni ka dërguar përforcime në vendet në kufi me Afganistanin për të siguruar tërheqjen e forcave të huaja nga vendi, e cila po shkon “sipas planit”, tha Sekretari i Mbrojtjes i SHBA Lloyd Austin.
“Tërheqja, e cila filloi gati një javë më parë, aktualisht po shkon sipas planit,” i tha Austin një konference shtypi në Pentagon.
I pyetur në lidhje me përplasjet e dhunshme në provincën Helmand që kur ushtria amerikane filloi tërheqjen e trupave të fundit nga vendi të shtunën, Austin tha se ato priteshin.
“Ne jemi dëshmitarë të asaj që prisnim: presion të rritur,” tha ai.
Për të siguruar procesin e tërheqjes, Pentagoni “pozicionoi” gjashtë bombardues të rëndë B-52 dhe 12 avionë luftarakë F-18 “për mbështetje, në rast nevoje”, tha shefi i shtabit të ushtrisë amerikane gjenerali Mark Milley.
Ata u shtuan në grupin detar ajror USS Eisenhower, misioni i të cilit në Gjirin Persik, u zgjat.
Përleshje të dhunshme shpërthyen gjatë fundjavës në provincën jugore të Helmand, ndërsa tërheqja e 2,500 trupave amerikane që ende qëndronin në territorin afgan filloi zyrtarisht të shtunën, me më shumë se 16,000 punonjës civilë të nënkontraktorëve të Pentagonit.
“Ne do të vazhdojmë të jemi partnerë të qeverisë afgane dhe forcave afgane dhe shpresojmë që këto të fundit të jenë të suksesshme me ndihmën tonë,” shtoi ministri i mbrojtjes.
“Ata kanë kapacitete mjaft të mëdha, por ne nuk mendojmë se do të jetë e lehtë për ta,” pranoi ai. /tesheshi.com/
