NATO nuk do të lejojë që tensionet në veri të Kosovës të përhapen në vendet fqinje, si dhe brenda Kosovës, tha të premten presidenti i Maqedonisë së Veriut, Stevo Pendarovski.
“Vlerësimi i Aleancës është se po arrin pika e vlimit në veri të Kosovës, por forcat e Aleancës, të cilat në ndërkohë do të përforcohen me një numër shtesë ushtarësh, do të jenë të mjaftueshme për të parandaluar përhapjen e destabilitetit në pjesët tjera të Kosovës, e lëre më në pjesë të tjera të rajonit”, tha ai.
Disa dhjetëra ushtarë të KFOR-it, një forcë e bashkësisë ndërkombëtare nën udhëheqjen e NATO-s, janë lënduar të hënën pasdite në një përleshje me demonstruesit serbë në Zveçan, në veri të Kosovës.
Serbët nga veriu i Kosovës, në mesin e të cilëve kishte edhe disa dhjetëra të lënduar, kundërshtuan ardhjen e kryetarëve shqiptarë në komunat e asaj pjese të Kosovës pas zgjedhjeve, të cilat u bojkotuan nga serbët.
Stabiliteti i Kosovës, i rëndësishëm për stabilitetin e rajonit
Pendarovski theksoi se kontributi i vendit të tij paraqet kontribut për stabilitetin e Maqedonisë së Veriut dhe më gjerë në rajon.
“Si anëtare e NATO-s ne monitorojmë drejtpërdrejt situatën në Kosovë. Ushtarët tanë nuk janë të stacionuar në veri të Kosovës, por ne kemi 65 ushtarë atje. Synimi ynë është të qëndrojmë atje dhe ta rrisim këtë kontigjent në të ardhmen. Së bashku kontribuojmë për sigurinë në rajon, sepse nëse kontribuojmë në stabilitetin e Kosovës, me të cilën jemi fqinj i drejtpërdrejtë, kontribuojmë edhe në stabilitetin dhe sigurinë tonë”, tha Pendarovski.
Presidenti maqedonas ishte nikoqir dhe pjesëmarrës i takimit në Ohër ku u ra dakord për aneksin e marrëveshjes ndërmjet Kosovës dhe Serbisë, rikujton Radio Evropa e Lirë (RSE).
I pyetur nëse beson se kjo marrëveshje është ende gjallë, Pendarovski citoi qëndrimin e Përfaqësuesit të Lartë të Bashkimit Evropian për Siguri dhe Politikë të Jashtme, Josep Borrell, se “situata në veri të Kosovës duhet të zgjidhet pavarësisht se sa e vështirë procesi do të jetë, sepse çështja mbetet e rëndësishme për stabilitetin dhe sigurinë më të gjerë evropiane”. /tesheshi.com/
