Dega kanadeze e lëvizjes antiislame, antiemigrante, PEGIDA (Europianët Patriotë Kundër Islamizimit të Europës), ka anuluar një manifestim për shkak të numrit të vogël të pjesëmarrësve. Lëvizja ka dështuar të zërë vend siç duhet, teksa vetëm një grusht njerëzish dolën në rrugë për të protestuar. Manifestimi ishte organizuar nga dega e porsahapur e lëvizjes antislame në Kuebek, por nuk ia doli të mbledhë njerëz aq sa duhej, përveç numrit të madh të forcave policore të gjendura në vendngjarje për parandalimin e incidenteve.
Në përgjigje të iniciativës së papërmbushur, në lagjen e Montrealit të njohur si Magrebi i Vogël, e në të cilën ka një bashkësi të madhe muslimane afrikanoveriore, pati një tubim të rreth 500 njerëzve që ptotestuan kundër lëvizjes PEGIDA.
Protestave të fundjavës u parapriu një deklaratë e kryetarit të bashkisë të Montrealit, Denis Coderre, i cili tha mes të tjerash se qyteti i Montrealit “është një vend mikpritës, dhe ne i dënojmë të gjitha format e islamofobisë”.
Prania e lëvizjeve të tilla si PEGIDA do t’i dëmtonte me shumë gjasa parimet themelvënëse të Kanadasë, të një shoqërie shumëkulturore që nga viti 1971, “kur qeveria e Kanadasë filloi ta njohë vlerën dhe dinjitetin e kanadezëve të të gjitha racave dhe grupeve etnike, të të gjitha gjuhëve dhe të të gjitha feve.”
Po ashtu dhe kryeministri i vendit, Stephen Harper, kërkoi nxjerrjen jashtë ligjit të lëvizjes, ndërsa ajo kërcënon qëndrimin tolerant dhe pluralist të vendit. /tesheshi.com/
