Partia Demokratike ka akuzuar qeverinë se po përdor një grup kriminal për të blerë votat në Dibër.
Kreu i grupit parlamentar të PD-së, Edi Paloka deklaroi se prej 10 ditësh në Dibër një grup i strukturuar kriminal po blen votat dhe kërcënon votuesit dibranë për llogari të kandidatit të maxhorancës, Muharem Rama.
Opozita ka dorëzuar në Prokurorinë për Krime të Rënda një kallëzim penal.
“Me emra të përveçëm, Partia Demokratike ka renditur faktet se si prej mbi 10 ditësh ky grup po ushtron presion tek votuesit në Dibër duke aplikuar skemën kriminale të blerjes së votës, por edhe të kanosjes direkte të qytetarëve dibranë”, thuhet në një deklaratë të PD.
Sipas opozitës, ky grup kriminal është i përbërë nga drejtues të administratës publike, të tatimeve, shefi i policisë e deri tek mjeku i KEMP-it, të cilët sipas saj, janë vënë në shërbim të blerjes së zgjedhjeve në Dibër.
“Partia Demokratike i kërkon Prokurorisë të nisë menjeherë hetimet për të vënë përpara përgjegjësisë këta kriminelë të votës së lirë, të veshur me pushtet nga Edi Rama dhe lidhjet e tij kriminale”, mbyllet deklarata e PD.
/tesheshi.com/
