Partia Demokratike i është rikthyer edhe njëherë akuzave ndaj kreut socialist të reformës në drejtësi, Fatmir Xhafaj, me pretendimin se i vëllai i tij, Agron Xhafaj, është një person i inkriminuar. Kjo në fakt kam ndodhur pa ndonjë shkak dhe duket si një akuzë e nxjerrë nga arkivat për ta konsumuar këtë të martë, pasi është konsumuar muaj më parë, sapo u miratua paketa e reformës, aty fundi i muajit korrik.
“Vetëm në kazanin e mbetjeve të Edi Ramës mund të gjesh kryetar komisioni ligjesh, një njeri që pretendon se do të reformojë drejtësinë, ndërkohë që i vëllai është në hetim për trafik droge nga shteti italian. Njeriu i përzgjedhur nga Edi Rama për të luftuar krimin në radhët e gjyqësorit është i zhytur në krimin e familjarit të tij. Antimafia italiane i ka dorëzuar policisë shqiptare përgjimet për 7 rastet e evidentuara ku është përfshirë drejtpërdrejtë Agron Xhafaj, në importimin, furnizimin, shpërndarjen dhe shitjen e lëndës narkotike në zona të ndryshme të Italisë.
“Fatmir Xhafaj vazhdon të drejtojë komisionin e ligjeve sepse kështu mbron vëllain e tij trafikant droge. Ky është shteti që ngriti Edi Rama, me trafikantë, kriminelë, vrasës e tutorë prostitutash. Mbajtja me çdo kusht e pushtetit jashtë vullnetit të qytetarëve është arsyeja se pse Edi Rama refuzon të zbatojë ligjin e dekriminalizimit. Aleanca e krimit, drogës dhe plehrave nuk do ta shpëtojë dot Edi Ramën nga zemërimi i qytetarëve”, kanë qenë disa nga frazat e deklaratës së Enkelejd Alibeajt, kreu i departamentit për rendin dhe sigurinë në PD.
Për këtë akuzë, nuk ka reaguar as Xhafaj e as vëllai i tij, por vetë Rama pat thënë pas rastit të parë të akuzave të opozitës, se si është “njeri punon e jeton ndershmërisht”. /tesheshi.com/
