Sekretari i Përgjithshëm i PD-së, Gazment Bardhi ka kundërshtuar deklaratat e ministrit për Evropën dhe Punët e Jashtme, Gent Cakaj, lidhur me raportin e OSBE/ODIHR.
Sipas Bardhit, raporti në fjalë nuk specifikonte që zgjedhjet ishin demokratike, legjitime dhe me standarde ndërkombëtare.
Ai madje tha se “për herë të parë që jepet një raportin mbi zgjedhjet lokale në Shqipëri, thuhet se ka pasur veprime nga ana e qeverisë, të institucioneve të tjera, prokurorisë, gjykatave kanë qenë tërësisht në kundërshtim me ligjin”.
Kundërshtimet vijnë pas deklaratës së ministrit Cakaj i cili tha se raporti i OSBE/ODIHR është më shumë kritik për opozitën, se sa që ishte kritik për zgjedhjet.
“Raporti i ODHIR- it e cilëson sjelljen e PD dhe LSI- së për sa i përket goditjes së godinës së kryeministrisë si të dhunshme. Jemi ekspozuar nga një dhunë vandaliste para dhe pas procesit zgjedhor. Këtë e thotë edhe raporti. Madje kemi pasur tentativa për bllokim të procesit të integrimit të Shqipërisë në BE,” kishte deklaruar Cakaj.
Misioni i OSBE/ODIHR kryen vëzhgime përkatëse sipas standardeve me partitë politike dhe me kandidatë, si dhe me përfaqësues të shoqërisë civile, medias dhe komunitetit ndërkombëtar. Në ditën e zgjedhjeve, vëzhguesit kanë monitoruar hapjen e qendrave të votimit, procesin e votimit, numërimin e votave dhe tabelat e rezultateve në të gjitha nivelet. /tesheshi.com/
