PD jashtë parlamentit ka shpalosur tre kushtëzime për të marrë pjesë në zgjedhje lokale, ku kërkon me patjetër një qeveri tjetër pa Ramën kryeministër.
Kreu Basha bëri me dije atë çfarë është konkluduar në mbledhjen e Kryesisë demokrate, duke kumtuar:
-Partia Demokratike e Shqipërisë të regjistrohet në zgjedhje vetëm pasi të jenë krijuar kushtet për zgjedhje të lira dhe të ndershme. Kriza e rëndë politike në vend, nuk mundëson standardet demokratike për zgjedhje të lira dhe të ndershme. Është provuar se Qeveria e Edi Ramës ka bashkëpunuar me krimin e organizuar për blerjen e votave.
-Partia Demokratike e Shqipërisë angazhohet në mbrojtje të demokracisë dhe të drejtës së votës së lirë të mos lejojë përveç zgjedhjeve të lira asnjë farsë elektorale; të pamundësojë përmes përshkallëzimit të aksionit opozitar dhe qytetar, mbajtjen e zgjedhjeve fasadë, të diktuara nga krimi i organizuar dhe paratë e pista që shkatërrojnë demokracinë dhe vullnetin e qytetarëve shqiptarë.
-Të mandatojë Kryetarin e Partisë dhe Sekretarin e Përgjithshëm për të negociuar me partitë politike të opozitës marrëveshjen për garantimin e zgjedhjeve të lira dhe të ndershme, për mbrojtjen e interesit publik dhe aksionin opozitar për plotësimin e këtyre objektivave, përfshirë, mandatin dhe detyrat e Qeverisë Tranzitore dhe platformën për zgjedhje të lira dhe të ndershme.
Siç mund të dallohet, pika e zgjedhjeve të parakohshme nuk është potencuar.
Deri më tani, duke anashkaluar Lokalet, PD kërkonte ikjen e Ramës, një qeveri tranzitore, e më pas zgjedhje të parakoshme. /tesheshi.com/
