Partia Demokratike ka akuzuar ditën e sotme kreun e qeverisë, Edi Ramën, duke thënë se ka vënë në krye të OSHEE-së në Kurbin kreun e një grupi kriminal që vidhte dhe trafikonte makina.
“Pas një hetimi të gjatë të prokurorisë së Shkodrës, ky person u arrestua natën e 5 prillit, nën akuzën e trafikimit të mjeteve motorike. Megjithëse nën arrest për këtë vepër të rëndë penale, Lekë Tuna vazhdon të jetë zyrtarisht kreu i OSHEE për Kurbinin”, – tha nga selia blu Enkeled Alibeaj.
Ai shtoi se ndërsa Edi Rama krekoset me represionin ndaj të pamundurve, banda e tij në OSHEE vazhdon të dhunojë qytetarët, vazhdon të shtojë radhët me kriminelë me damkë.
Sipas Alibeaj, në gjithë Kurbinin, mes qindra të rinjve e të rejave, burrave e grave me integritet e të arsimuar, Edi Rama i vuri gishtin pikërisht këtij vjedhësi dhe trafikanti makinash, kreut të një grupi të strukturuar kriminal, me lidhje dhe me mafian rajonale, për ti besuar drejtimin e OSHEE.
“Për këta trafikantë me të cilët ndan pushtetin, me të cilët sundon qytetet dhe i ka sjellë deri në parlament, Edi Rama nuk e donte dekriminalizimin dhe bëri çdo përpjekje për ta ndalur atë. Prandaj dekriminalizimi është jetik dhe duhet të zbatohet një orë e më parë që zyrat publike dhe politika të pastrohen nga banditët e Edi Ramës”, – përfundoi deklaratën e tij kreu i Departamentit për Rendin dhe Sigurinë në PD. /tesheshi.com/
