Astrit Patozi, i përjashtuari i madh nga Basha krahas znj. Topalli, vijon opozitën e tij nga jashtë grupit parlamentar ku nuk bën pjesë, përgjithësisht me statuse FB. Më të fundit ai ia ka kushtuar një debati të brendshëm në grup, duke gjykuar se aty nuk është më Tahiri shqetësim por ai dhe të tjerë si ai.
“Ne mendonim se Lulzim Basha po i mbledh njerëzit këto ditë për t’i organizuar kundër qeverisë, sidomos tani që çështja ‘Tahiri’ i ka rënë opozitës si dhuratë nga qielli. Që në mos e rrëzoftë dot, të paktën t’ia bëjë jetën e vështirë Edi Ramës.
Por edhe pse qeveria është me brekë nëpër këmbë dhe po përpëlitet, këta e paskan hallin në vend tjetër.
Ndiqni raportimet e shtypit për mbledhjen e fundit të grupit parlamentar të Partisë Demokratike. Shqetësimi nuk qenka, as droga, dhe as lidhjet e politikës me krimin, por si ta pastrojmë edhe më shumë partinë nga armiku i brendshëm. Pushka top ju bëftë, o trima!
Takova sot një deputet të listës ‘Basha; dhe i thashë me shaka se qeverinë edhe mund ta rrëzoni, kurse ne ‘armiqve’ nuk na bëni dot gjë më. Sepse nuk keni nga çfarë të na shkarkoni. Vetëm burgu dhe vdekja kanë ngelur, por ato, për fat, nuk i ka në dorë Lulzim Basha”, shkruan Patozi.
Ndërkaq, lëvizja që ky i fundit ka iniciuar, së bashku me Besnik Mustafajn dhe të tjerë që nuk pajtohen me stilin bashist të PD-së, pothuajse është e fikur. /tesheshi.com/
