Ish-nënkryetari i PD-së, Astrit Patozi, ka ironizuar rikthimin e Lulzim Bashës si deputet në Kuvendin e Shqipërisë. Patozi është një nga kundërshtarët më të fortë të Bashës në rradhët e demokratëve dhe duket se ende nuk ka gëlltitur faktin se u la jashtë listave të kandidatëve për deputet, dhe rrjedhimisht edhe jashtë parlamentit në këtë legjislaturë.
Përmes një postimi në rrjetet sociale, Patozi shkruan se Parlamenti i ri nuk do të mund të kuptohej pa Lulzim Bashën dhe Shqipëria ka vuajtur shumë mungesën e tij atje.
“Sot mësova me habi se mungesa e Lulzim Bashës në parlamentin e 4 viteve të shkuara paska qenë gabim. Zakonisht në raste të tilla kërkohet falje, por ky nuk është ndonjë zakon që pëlqehet shumë në Shqipëri. Por nëse ishte vërtet kështu, kujt duhet t’ia dimë për nder që na e bëri këtë gjëmë, njeriut apo Zotit?
Atij vetë, që vajti e u “internua” si kryetar i Bashkisë së Tiranës, atyre që e propozuan, atyre që e mbështetën dhe e votuan si të tillë, apo kundërshtarëve që nuk ndryshuan rregullat, kur erdhën në pushtet?
Sepse, me sa po thuhet, parlamenti shqiptar nuk mund t’u kuptoka kurrë pa Lulzim Bashën. Dhe Shqipëria e paska vuajtur shumë mosqenien e tij.Por ja që, si gjithmonë, Zoti vonon, por nuk harron. Tani Lulzim Basha është rikthyer, gabimi është ndrequr më në fund dhe Shqipëria thjesht duhet të falenderojë krijuesin dhe duhet të presë frutet e shpejta të kësaj mrekullie”, shkruan Patozi në reagimin e tij. /tesheshi.com/
