Pasuesi i Gjicit: a do kemi të parin “njeri të Zotit” në krye të një bashkie?

Siç raportohet nga një media, Prefekti i Kukësit Ali Hallaçi është emri kryesor për të pasuar Safet Gjicin në krye të Bashkisë së qytetit veror, tronditur së fundi nga një video-skandal erotik.

Aty, Gjici që tashmë është arrestuar nga SPAK, shfaqet duket kryer marrëdhënie seksuale në zyrën e shtetit. Përveç kësaj, tregon dhe gadishmërinë për t’i dhënë partneres një tender për trajtimin e qenve, çfarë mund të jetë dhe shkelja më e rëndë për gjykim e ndëshkim penal.

Por tani vjen momenti tjetër politik pak pas fushate, ai i zgjedhjes së një kandidature që do e eklipsojë këtë zhvillim të rëndë amoral politikisht dhe imoral etikisht.

PS duhet të gjejë një figurë bindëse për këtë moment të vështirë për të mos e humbur Kukësin, siç ia doli me Dibrën në 2016-ën, ku në një rast të ngjashëm e zëvëndësoi Shukri Xhelilin e “kapur mat” me një doktor të nderuar të qytetit, Muharrem Ramën.

Kësaj here sfida është më e vështirë. Ndaj, si emër i mundshëm përflitet ai i Ali Hallaçit, ish-Myfti i Kukësit. Nëse ndodh, do kemi të parën figurë me profil fetar në postkomunizëm që merr menaxhimin e një qyteti si kryebashkiak.

Më herët, në fillimet e shtetit shqiptar, qytetet kryesore janë drejtuar pikërisht prej tyre, myftinjve, të cilët ishin figurat më elitare të kohës prej impaktit të madh publik dhe përgatitjes së lartë arsimore.

Por gjithashtu, nëse ndodh kjo, Kukësi do përbëjë rastin kur i(a)moraliteti shërohet me moralitet të nivelit superior, atij fetar, që më shumë se nga frika ndaj ligjit formësohet nga frika ndaj Zotit.

Po ta kishte patur këtë të dytën, pasi të parën e ka injoruar paq, Safet Gjici nuk do kishte mbërritur në pikën ku atë që i ka ndodhur nuk do ia uronte as hasmit, veç rastit ku hasmi i tij është pikërisht njeriu që ia ka bërë të keqen e paimagjinueshme. /tesheshi.com/