“Pastrim” nga Austria për akademikun musliman të “bërë pis” prej saj

Akuzat për “terrorizëm” kundër akademikut austriak Farid Hafez janë hequr pasi një dokumentar i Al Jazeera-s zbuloi se si çështja bazohej në prova të rreme dhe akuza të fabrikuara.

Në një intervistë me Al Jazeera-n, Hafez tha se u qetësua që nuk jeton më në “harresë” dy vjet pasi oficerët e policisë hynë në shtëpinë e tij dhe i drejtuan armët atij, gruas dhe dy fëmijëve të tyre.

“Kurrë nuk e dija nëse gjyqtarët do të ngrinin aktakuzë, gjë që vërtet kurrë nuk e besova. Por kurrë nuk e kam besuar se diçka e tillë mund të ndodhë me shtëpinë time”, tregon ai.

Hafez është i njohur për raportin e tij vjetor mbi islamofobinë në Evropë dhe është një nga themeluesit e Shoqatës së Rinisë Muslimane Austriake.

“Armiqësi ndaj shtetit”

Ky politolog, kur e kthen kokën pas situatës, thotë se gjërat për të cilat është akuzuar janë “çmenduri” dhe se gjithçka ka ndodhur papritur. Shtëpia e Hafezit është një nga afërsisht 60 shtëpitë e aktivistëve dhe akademikëve muslimanë që u bastisën nga policia në nëntor 2020, si pjesë e “Operacionit Luxor”, siç deklaroi ministri i brendshëm i Austrisë.

Urdhri i kërkimit thoshte se Hafezi, i cili është me origjinë egjiptiane, dëshiron të shkatërrojë Egjiptin dhe Izraelin dhe të krijojë një kalifat islamik mbarëbotëror, me kryeqytet në Jerusalem. Krahas “mbështetjes së terrorizmit”, policia e ka akuzuar edhe për vepra të tjera kriminale si “armiqësi ndaj shtetit” dhe “pastrim parash”.

Llogaria bankare e Hafezit ishte ngrirë dhe ai nuk ishte në gjendje të paguante avokatët apo të riparonte dëmin e shkaktuar nga bastisja. Akademiku, i cili më pas u transferua në SHBA dhe u bë profesor në Universitetin Georgetown, thotë se u rrezikua jeta e shumë personave të shënjestruar nga ngrirja e aseteve në këtë aksion.

Disa prej tyre ishin në arrati për shkak të kundërshtimit ndaj autoriteteve egjiptiane, si dhe akademikëve që kritikuan politikat austriake, të konsideruara si diskriminuese në komunitetin musliman, si mbyllja e xhamive ose ndalimi i hixhabit.

“Islami politik”

Hafez thotë se studimi i tij mbi islamofobinë është “ripaketuar” dhe portretizuar si “një formë terrorizmi”. Prandaj, akuzat ishin të pamjaftueshme, por ai beson se kurrë nuk ka pasur ndonjë qëllim për të ndërtuar një çështje të fortë.

“Ideja ishte në thelb për të heshtur çdo formë kritike ndaj diskriminimit austriak kundër muslimanëve”, shton ai.

Filmi i Al Jazeera-s “Operacioni i Austrisë Luxor”, i publikuar në maj 2022, shqyrton ngjarjet e 9 nëntorit 2020 kur policia bastisi shtëpitë dhe organizatat muslimane në të gjithë Austrinë si pjesë e asaj që pretendohej të ishte një operacion i madh “anti-terrorist”.

Në një shkrim për Al Jazeera-n në qershor 2021, Hafez argumentoi se këto bastisje ishin një tregues i shkallës në të cilën qeveria austriake e identifikoi “islamin politik” si një kërcënim për shtetin. Në këtë proces, thotë më tej ai, autoritetet austriake shënjestruan si anëtarët realë ashtu edhe ata imagjinarë të Vëllazërisë Muslimane.

“Politikat shtetërore kundër muslimanëve, dhe veçanërisht pjesa kundër ‘islamit politik’ dhe ‘vëllazërisë muslimane’ në Austri, janë problematike sepse ato kanë pasoja shkatërruese për shoqërinë civile muslimane dhe grupet që luftojnë për të drejtat e njeriut dhe kundër islamofobisë në Evropë,” shkroi Hafëz. /tesheshi.com/