Ish-presidenti amerikan, Barack Obama dhe bashkëshortja e tij, Michelle janë në negociatat e fundit me rrjetin televiziv kabllor Netflix, për të prodhuar serinë e shfaqjeve të tyre. Shërbimi televiziv ka rreth 118 milionë abonentë.
Burime të “New York Times” thanë se episodet dhe formati nuk janë përcaktuar ende dhe se Obamat nuk synojnë të përdorin programet e tyre për të reaguar drejtpëdrejt ndaj kritikave të pasardhësit në Shtëpinë e Bardhë, Donald Trump apo kundërshtarëve të tjerë politikë.
Përveç Netfliz, edhe drejtues të “Apple” dhe “Amazon” kanë shprehur interes për bisedime me Obamat në lidhje me marrëveshje të mundshme.
Marrëveshja me Netflix do t’u jepte Obamave një mjet pa filtra komunikimi me publikun, edhe pse nuk është e qartë sesa do të paguhen ata. Netflix, së fundmi, nënshkroi një kontratë pesëvjeçare prej 300 milionë dollarësh për të joshur Ryan Murphy të largohej nga kompania “21st Century Fox”.
Këshilltari i ngushtë i Obamës, Eric Schultz, tha për “New York Times”: “Presidenti dhe zonja Obama kanë besuar gjithnjë në fuqinë e të treguarit të historive për të frymëzuar njerëzit. Gjatë gjithë jetës së tyre, ata kanë bërë të njohura historitë e njerëzve, përpjekjet e të cilëve për të sjellë ndryshimin, po ndryshojnë qetësisht e në heshtje botën për më mirë”. /tesheshi.com/
