Tonet e buta të Donald Trump-it në Meksikë, në takimin me presidentin Enrique Pena Nieto, ua kanë lënë vendin fjalëve të ashpra në Arizona.
Një Trump ndryshe nga ai në Meksikë, do të deklaronte orë më vonë në fjalimin e tij në Feniks: “Nuk do të ketë amnisti! Kushdo që hyn ilegalisht në SHBA do t’i nënshtrohet deportimit, dhe do të ketë paraburgim për emigrantët që kryejnë çdo shkelje, jo vetëm krime.”
Donald Trump, duke folur siç vetëm ai di të flasë, është zotuar të deportojë miliona njerëz pa dokumente dhe të ndërtojë një mur me Meksikën.
“Do ta rimarrim vendin,” ka thënë, duke shpalosur planet për një forcë deportimi, që do të shërbejë për t’i pikasur ata që e kalojnë kufirin ilegalisht e për t’i gjurmuar të huajt ilegalë tashmë në SHBA.
Në fjalimin në Arizona për emigracionin, Trump deklaroi se Meksika do të paguajë 100% për murin që do të ngrihet midis dy vendeve. Ai tha se nuk e kishte biseduar me presidentin meksikan çështjen e pagesës për murin. Por Pena Nieto pretendon të kundërtën, se ia ka bërë të qartë Trump-it se vendi tij nuk do të paguajë për murin.
Presidenti meksikan do të thoshte në një intervistë televizive të mëvonshme: “Qëndrimi i tij politik mund të përbëjë një kërcënim të madh për Meksikën, dhe unë nuk jam i përgatitur t’i mbaj krahët e kryqëzuara e të mos bëj asgjë.” /tesheshi.com/
