Nga Blendi Gashi
Isa Mustafa, ka surprizuar anëtarët e partisë së tij dhe opinionin në përgjithësi, duke thënë se kandiati për kryeministër të LDK-së do të jetë një djalë i ri, e jo ai.
“Në bisedë me bashkëpunëtorët e ngushtë kemi vendosur që në mandatin e ardhshëm të kemi një kryeministër tjetër. Sepse ne duhet të hapim rrugë në LDK për kuadro. Duhet të hapim rrugë për njerëz të ri. Unë do të ulem me Nënkryetarët e Partisë, me Sekretarin, me Kryetarët e Degëve dhe do të dalim me propozim se kush do të jetë Kryeministër i ardhshëm i Republikës nga LDK-ja”, ka deklaruar Mustafa, të shtunën në shënimin e përvjetorit të 27 të Degës së LDK-së në Istog, me ç’rast ka marrë duartrokitje të shumta nga anëtarët dhe simpatizantët e kësaj partie.
Megjithatë Mustafa nuk ka treguar se kush do jetë djali i ri i LDK-së, që do e nominoi partia për kryeministër.
Pavarësisht hezitimit të Mustafës për të treguar emrin, veprimi i tij duhet përshëndetur, duke ditur se LDK në gjirin e saj ka shumë djem e vajza të shkolluara që janë pjesë e strukturave të larta të partisë.
Po kush mund të jenë kandidat e mundshëm të LDK-së për kryeministër?
Kujtim Shala, padyshim se është një prej të rinjëve të LDK-së që mund ta marrë besimin e Mustafës që të jetë kandidat për kryetar qeverie.
Në qeverinë e kaluara gjatë një kohe mbajti postin e zv.kryeministrit dhe pozitën e ministrit të Kulturës.
Shala, ka raporte tejet të mira me Mustafën dhe njëherit është një nga figurat më të përgatitura në LDK. Është profesor në Universitetin e Prishtinës, si dhe profesor i jashtëm në Universitetin e Tiranës.
Me profesion studiues i letërsisë dhe i kulturës shqiptare. Ka studiuar në Universitetin e Prishtinës dhe në Universitetin e Bolonjës (Itali). I specializuar në teori letrare, forma letrare dhe në estetikë (filozofi).
Është autor i 31 veprave shkencore dhe letrare. Njëherit është edhe udhëheqës i ekipit të ekspertëve të arsimit e të shkencës së LDK-së.
Lumir Abdixhiku, aktualisht drejtor i Institutit Riinvest, së fundmi është raportuar se do aderoi në LDK me ç’rast thuhet se ka zhvilluar edhe biseda me Mustafën.
Abdixhiku, një economist i dëshmuar mund të marrë përkrahjen e LDK-së për kandidat për kryeministër nëse bëhet pjesë e këtij subjekti. Arsyeja pse do pranonin krerët e LDK-së është se Abdixhiku shihet si një kuadër tejet i përgatitur dhe padyshim se do ishte ndër kandidatët më adekuat që mund të “detyronte” shumë njerëz të votojnë për LDK-në.
Dhe Mustafa i vetëdijshëm se ai nuk do arrinte të nxjerrte partinë si fituese ashtu si edhe asnjë nga nënkryetarët e partisë Lutfi Haziri apo Agim Veliu, lehtësisht mund ta kandidoj Abdixhikun dhe nëse LDK humbet do të shpëtonin disi nga kritikat, duke thënë se kanë nxjerrë një kandidat të ri dhe tejet profesional. Pra, Mustafa me Abdixhikun po shkon në stilin krejt ose asgjë.
Arban Abrashi, poashtu mund të marrë bekimin e Mustafës dhe nënkryetarëve të LDK-së për kryeministër.
Ndonëse tre vjet më parë pak kush e njohu, Mustafa e bëri ministër të Punës dhe Mirëqenies Sociale, dhe zëdhënës të qeverisë, dhe tashmë gëzon një përkrahje si brenda LDK-së poashtu edhe në opinion, pasi nuk njihet si një politikan grindavec.
Anton Quni, poashtu mund të jetë i përzgjedhur nga Mustafa për kandidat për kryeministër. Ka një respekt të madh në parti, për shkak edhe se ka qenë komandat i UÇK-së.
Por, mbi të gjitha ka fituar një përkrahje të madhe në parti pas fjalimit të bërë në seancën e fundit ku u rrëzua qeveria, me ç’rast deklaroi se ka dashur të largohet nga politika, por do qëndroj vetëm që të punoj që të sheh prapa grilave Kadri Veselin e Hashim Thaçin.
Megjithatë, Quni nuk mund të thuhet se është një politikan i ri, ashtu siç ka premtuar dhe Mustafa që do e kandidoj, andaj ka gjasa më pak se tre të parët.
Avdullah Hoti, është një tjetër figurë që LDK mund ta kandidojë për kryeministër. Që nga qeverisja e Prishtinës ka qenë krah i djathtë i Mustafës, dhe edhe në qeverinë në largim i ka besuar një ndër dikasterët më të besueshëm, bëhet fjalë për Ministrinë e Financave. Por Hoti ka përjashtuar mundësinë e kandidimit.
Vjosa Osmani, dihet se është një nga figurat më të respektuara nga elektorati i LDK-së dhe një politikane e shkolluar.
Padyshim se elektorali i LDK-së do e dëshironte kandidate për kryeministër, por mbetet të shihet nëse Mustafa do lë anash armiqësitë dhe ta kandidoj Vjosën. Megjithatë, duhet thënë se ka tre vite pothuajse nuk komunikojnë mes vete, nga lidhja e koalicionit të fundit PDK-LDK, që Vjosa ishte kundër, andaj është pak e besueshme se mund ta kandidojnë edhe pse padyshim se do ishte zgjedhja më e qëlluar. Dhe duke ditur se asnjëherë qeveria nuk është drejtuar nga një femër, Vjosa do e meritonte, jo vetëm për shkak të shkollimit, por edhe përkrahjes së madhe që ka marrë nga votuesit në zgjedhjet e fundit, ku është renditur si femra më e votuar në LDK. /tesheshi.com/
