Forcat special RENEA, FNSH, drejtues të policisë kriminale, me mbështetjen edhe të prokurorëve kanë nisur një operacion të gjerë në Elbasan, ku raportohet për disa ndalime dhe kontrolle në pronat e elementëve kriminalë.
Operacioni i policisë ka nisur pas një takimi që Drejtori i Përgjithshëm i Policisë së Shtetit, Haki Çako, ka pasur me drejtues të policisë vendore.
Burimet shprehen se operacioni synon goditjen e elementëve kriminalë dhe bllokimin e aseteve të krimit.
Në 18 shtator, një audi i blinduar goditi makinën e zv. drejtorit të policisë së Elbasanit.
Incident ndodhi pranë tregut agro-ushqimor në Elbasan dhe në momentin kur uniformat blu i kërkuan drejtuesit Kelmend Xhaferri 35 vjeç që të shkonte për verifikim në komisariat, një makinë Audi e blinduar përplasi makinën e policisë.
Policia më pas zhvilloi një aksion të gjerë duke sekuestruar 7 automjete dhe shpallur në kërkim autorët e ngjarjes.
Këto mjete rezultojnë të jenë në pronësi të biznesmenit Petrit Çela, ndërsa është shpallur në kërkim djali i tij Suel Çela. /tesheshi.com/
