Komisioni i Jashtëm i Parlamentit Europian në Bruksel pritet të diskutojë sot raportin e Knut Fleckenstein për Shqipërinë. Raporti njoftohet se do të diskutohet rreth orës 15:00 deri në orën 18:30. Raporti i progresit për Shqipërinë i raportuesit, Knut Fleckenstein do të votohet ditën e martë më 14 prill, po në Komisionin e Jashtëm të Parlamentit Europian.
Ndërkohë, raporti final do të miratohet zyrtarisht në seancën e Strasburgut nga data 27 dhe 30 prill.
Eurodeputetët kanë paraqitur 192 amendamente kryesisht për dekriminalizimin, luftën kundër krimit të organizuar e korrupsionin. Ata reflektojnë së shumti shqetësimin për zhvillimet e fundit politike në vend, infiltrimin e qarqeve kriminale në jetën politike dhe hallkat e drejtësisë, si dhe nivelin e lartë të korrupsionit. Për dekriminalizimin e institucioneve shqiptare janë paraqitur disa amendamente ku nënvizohet trajtimi i personave me të dhëna kriminale në postet publike. Në amendamentet e shumta për gjyqësorin dhe luftën kundër krimit të organizuar është shtuar në mënyrë të përsëritur togëfjalëshi “infiltrimi i qarqeve kriminale”.
Për gjyqësorin kërkohet gjithashtu forcimi i kornizës disiplinore për gjyqtarët, prokurorët dhe avokatët, si dhe përmirësimi i efikasitetit të gjykatave. Korrupsioni mbetet ende një shqetësim shumë i madh në draft-rezolutë dhe të gjitha amendamentet lidhur me këtë fenomen. Mirëpritet fillimi i zbatimit të ligjit për shërbimin publik në administraten publike dhe kërkohet që shërbimi publik të jetë i depolitizuar dhe i lirë nga ndikimi i korrupsionit dhe krimit të organizuar.
Tërhiqet vëmendja për shqetësimin lidhur me ndikimin e mundshëm të moszbatimit të ndryshimeve të Kodit Zgjedhor, që mund të ketë një ndikim negativ në zgjedhjet e ardhshme. Janë paraqitur gjithashtu amendamente, ku shprehet shqetësim i thellë në lidhje me kthimin në territorin e Shqipërisë të njerëzve të përfshirë në organizata dhe akteve terroriste në Lindjen e Mesme. Eurodeputetët kërkojnë progres në mbrojtjen e të drejtave të pronës, te minoritetit dhe hartimin e një projektligji për të hapur arkivat e shërbimeve sekrete të periudhës së komunizmit.
