Kryeministri Rama ka rrëzuar paketën e amendamenteve të opozitës lidhur me buxhetin 2018, duke thënë se ato i përkasin vitit 2005.
“Amendamentet e opozitës për buxhetin që provojnë katërcipërisht atë që njerëzit dinë, shohin dhe dëgjojnë përditë që PD nuk ka asnjë vizion alternativ për Shqipërinë, nuk ka asnjë program alternativ për të ardhmen, dhe nuk ka asnjë ide tjetër përveç ideve të saj të vjetra të shkruara në programin elektoral të vitit 2005 dhe të rezultuara thjesht dëshira të natyrës elektorale për tetë vjet me radhë në qeverisjen e vendit”, tha Rama.
“Uji që rreh sot në hava Partia Demokratike nuk ka asnjë lidhje me rrjedhën e zhvillimeve të vendit. Është thjesht ‘më ka çu nana me la gojën’, e ndërkohë që jemi të zënë me bolorinë, “krim, krim, krim, drogë, drogë, drogë, akuza, akuza, akuza”, meqë na doli buxheti para në çastin e fundit po bëjmë dhe ne ca propozime që të themi se jemi gjallë akoma”, shtoi më tej kryeministri.
Nga ana e tij, Basha akuzoi qeverinë për shumëçka, që nga “droga” e “krimi” si kryefjalë, deri te kaldaja e shkollës së Shupenzës apo fëmijët-minatorë në terren në Bulqizë.
“Pak javë më parë, Edi Rama i mohoi botërisht fëmijët e Bulqizës që rropaten duke mbledhur krom, duke i vulosur fatin për sa kohë ky mban çelësat e qeverisjes. Fati i keq i përndoqi këta fëmijë edhe ne shkolla. 70 nxënës u helmuan nga tymi i kaldajës, i montuar keq. Por askush nuk ka kërkuar falje. Po këto ditë, një kompani që qeveria i ka dhënë koncesionin e djegies së plehrave në Fier mori 4.8 milionë euro pa bërë asgjë. Si ka mundësi që një qeveri, ti japi 4.8 mln euro një kompanie që nuk ka bërë asgjë dhe të mos mendojë për fëmijët që rropaten për bukën e gojës. Pas kësaj kompanie qëndrojnë Ahmetaj dhe Edi Rama. Palmat e thara, 8 milionë euro do të mjaftonin për një rrogë minimale për çdo familje të Bulqizës. Po rata vazhdojnë të rropaten dhe do të vazhdojnë ta bëjnë këtë. Këtë mund ta bëjë vetëm një kryeministër që i ka vënë shkelmin qytetarëve të vendit të vetë”, u shpreh Basha. /tesheshi.com/
