Rreth 3.8 milionë euro janë bllokuar në 6 muajt e parë të 2017 më kërkesë të Drejtorisë së Përgjithshme të Parandalimit të Pastrimit të Parave.
Në prokurori janë referuar nga DPPPP 178 raste të dyshimit të pastrimit të produkteve të veprave penale, nga të cilat në vetëm 31 raste është marrë vendimi për bllokim, ndërsa rastet e tjera sikundër mësohet nga burimii akuzës janë në shqyrtim ose hetimet janë mbyllur për shkak të sqarimit të çështjes.
Sikundër raportohet në rreth 91% të rasteve të raportuara subjektet që kanë bërë raportimin janë ato që detyrohen me ligj, duke nisur nga bankat, noterët, agjencitë e këmbimit të valutës, ato të transfertave të parave.
Shifra e bllokuar në këtë 6 mujor është dukshëm më e ulët se ajo e një viti më parë, ku u bllokuan 29 milionë euro si të ardhura të dyshuara nga aktivitet kriminal.
Ende nuk ka të dhëna se nga cilat aktivitete mund të jetë përfituar shuma e bllokuar, por dyshimet janë se një pjesë e konsiderueshme e tyre mund të ketë lidhje me lëndët narkotike.
DPPPP është një nga institucionet kyçe në luftën ndaj pastrimit të parave dhe merr një rëndësi të veçantë në kuadër të luftës kundër çdo aktiviteti kriminal, përfshi këtu edhe kultivimin dhe trafikimin e lëndëve narkotike. Në këtë kuadër, DPPP në planin e saj, bazuar kjo edhe në vendimin e TASK Force kundër lëndëve narkotike, do të rrisë kontrollin ndaj qarkullimit të parasë, transaksioneve të dyshimta përmes sistemit banker apo rasteve të dyshuara për pastrim parash.
Burimet shprehen se në këtë kuadër do të ketë një bashkëpunim edhe më efikas mes institucioneve dhe agjensive ligjzbatuese në vend me synimin rritjen e forcës goditëse. /tesheshi.com/
