Ndërhyrja e shpejtë e policisë në një konflikt të ndodhur në fshatin Tushemisht në Pogradec ka shmangur përshkallëzimin, duke evituar ndoshta edhe një krim.
Policia bëri të ditur se ka shpallur në kërkim shtetasin me inicialet A.P, 25 vjeç, banues në Tushemisht, i cili pas një konflikti për motive të dobëta me shtetasin G.Xh 33 vjeç, ka shkuar në shtëpi dhe ka marrë një armë automatike.
Por ndërhyrja e menjëhershme e policisë ka shmangur ngjarjen e rëndë, ndërsa 25 vjeçari është larguar sapo ka vënë re praninë e uniformave blu.
Njoftimi i policisë
Më datë 03.08.2017, jemi njoftuar se në fshatin Tushemisht, janë konfliktuar në rrugë, për motive të dobëta shtetasit A.P, 25 vjeç dhe shtetasi G.Xh, 33 vjeç, banues në Pogradec.
Pas këtij konflikti dyshohet se shtetasi A.P, ka shkuar në banesën e tij në fshatin Tushemisht dhe ka marrë një armë zjarri tip kallashnikov, me qëllim që të ndiqte personin me të cilin ishte konfliktuar.
Reagimi në kohë i Policisë, bëri të mundur parandalimin e përshkallëzimit të mëtejshëm të konfliktit midis këtyre dy shtetasve, pikërisht në një lokal në fshatin Tushemisht, ku shtetasi A.P, pasi kishte marrë armën, kishte hyrë në ambjentet e tij për të kërkuar shtetasin G.Xh.
Porsa ka parë shërbimet e Policisë ky i fundit, është larguar me shpejtësi.
Nga ana e Policisë, janë ngritur grupe kontrolli dhe po vijon krehja e zonës për kapjen e tij.
Grupi hetimor po punon për zbardhjen e rrethanave të ngjarjes, si edhe dokumentimin e plotë të saj. /tesheshi.com/
