Numri i nxënësve që ndoqën arsimin 9-vjeçar gjatë vitit të kaluar shënoi rënien më të madhe që nga viti 1991, duke dhënë sinjale alarmi se forca e re e punës në Shqipëri do të vihet në vështirësi në dekadën në vijim.
Sipas të dhënave të INSTAT, numri i nxënësve që ndoqën arsimin 9-vjeçar në 2015-2016 u ul me 5.4 për qind në raport me vitin 2014-2015. Kjo është rënia më e madhe në 26 vitet e fundit.
Në të gjithë vendin arsimi 9-vjeçar u ndoq nga më shumë se 343 mijë nxënës në 2016, ndërsa një vit më parë shifra ishte në 363000.
Popullsia në grupmoshën 5 deri në 14 vjeç në vitin 2016 ishte mbi 363 mijë persona.
Rënia e numrit të popullsisë në moshë të re, po lidhet me dy shkaqe kryesorë; rënia e numrit të lindjeve dhe emigracioni.
Treguesit demografik të vendit po përkeqësohen nga këto shkaqe, ndërsa shtesa natyrore e popullsisë për tremujorin e parë 2017 pasqyron një rënie me 33,6%, në krahasim me të njëjtën periudhë të 2016-ës, raporton Monitor.
Plakja e popullsisë po rrit me shpejtësi numrin e pensionistëve në vend e për pasojë, nevojën për fonde shtesë ndaj arkës së pensioneve. Të dhënat nga instituti i Sigurimeve Shoqërore tregojnë se për vitin 2016, numri i personave në pension arriti në 611,544, me një shtesë prej mbi 12 600 pensionistësh nga 2015-a./tesheshi.com/
