Në vijim të takimeve në Vlorë, që nisën nga pasditja e djeshme me një mbledhje qeverie, kryeministri, Edi Rama, ka zhvilluar një bashkëbisedim me qytetarët, kun ë vëmendje ishte sistemi arsimor.
Gjatë bisedës me prindër e mësues të shkollës 9 vjeçare “Jani Minga”, Rama ka theksuar se drejtorët e shkollave do të kalojnë në sitë, ndërsa ka premtuar ndryshim të thellë në sistemin arsimor. Në këtë kuadër ai ka kërkuar ndihmën dhe bashkëpunimin e prindërve, por edhe komunitetit në tërësi.
“Ka ndodhur që është bërë baltë me drejtorët dhe nëndrejtorët e shkollave. Do t’i vihet fre kësaj në të gjitha ato rastet kur konstatohet nivel shqetësues injorance i drejtuesve të shkollave. Drejtorë shkollash që janë nën nivelin e mësuesve nuk mund të pranohen, e për këtë arsye, 300 mësuesit më të mirë të dalë nga testimi kombëtar, do të ftohen të drejtojnë shkollat në vend të 300 drejtorëve më problematikë të sistemit arsimor”, tha ai.
Gjatë bashkëbisedimit, një nënë e 6 fëmijëve ka komplementuar Ramën për punën që po bëhet me shkollat.
“Ju falënderoj, pasi si nënë e gjashtë fëmijëve më parë e kam pasur shumë të vështirë, tani figura e mësuesit ka tjetër vlerë”, tha ajo.
Pas saj e ka marrë fjalën një tjetër qytetar, që nuk i ka kursyer lavdet ndaj Ramës dhe kryetarit të Bashkisë së Vlorës, duke thënë se e mbështet idenë e zonjës parafolëse, edhe pse nuk ka aq shumë fëmijë.
“Nga eksperienca ime personale ke kohë akoma, mund ta kapësh zonjën”, tha Rama, i cili pothuajse në çdo takim përdor batutat.
Por qytetari i është përgjigjur se e ka mbyllur çështjen e fëmijëve, ndërsa Rama në vijim të batutave ka shtuar “kështu mendoja edhe unë, por…”. /tesheshi.com/
